REG BBC yegukanye igikombe cya shampiyona irusha Patriots

REG BBC yegukanye igikombe cya shampiyona y’u Rwanda ya Basketball, irusha Patriots BBC nyuma y’imikino itanu amakipe yombi agundagurana.

Mu mikino ine ya kamarampaka, buri kipe yatsinze imikino ibiri, biba ngombwa ko hitabazwa umukino wa gatanu wabaye kuri uyu wa 18 Nzeri 2022.

Uyu mukino wa nyuma REG yawutsinze ku manota 84 kuri 74 ya Patriots.

REG BBC yayoboye umukino kuva ku gace ka mbere kugera ku ka kane, ndetse byageze n’aho irusha Patriots amanota 20.

Patriots yagerageje gukuramo ikinyuranyo cy’amanota mu gace ka nyuma, aho yageje kuri 58 REG iri kuri 61, ariko nyuma yongeye kurushwa imbaraga, ibura igikombe.

REG BBC ni yo yaherukaga igikombe cya shampiyona y’u Rwanda mu mwaka ushize. Izahagararira igihugu muri shampiyona nyafurika ya Basketball, BAL.