Ikipe ya RSSB Tigers BBC yanditse amateka yo kuba ikipe ya mbere yo mu Rwanda ndetse no muri Afurika y’Iburasirazuba, yegukanye igikombe cya Basketball Africa League (BAL), nyuma yo gutsinda Petro de Luanda yo muri Angola amanota 90 kuri 88.
Hari mu mukino wa nyuma wabereye muri BK Arena, ku Cyumweru tariki ya 31 Gicurasi 2026.
RSSB Tigers yahawe amahirwe yo gukina BAL isimbuye APR BBC yari yarakuwe mu marushanwa mbere y’uko atangira.
Mbere y’itangira rya BAL 2026, ubuyobozi bw’iri rushanwa bwatangaje ko APR Basketball Club itazaryitabira nyuma y’uko Leta Zunze Ubumwe za Amerika zifatiye ibihano Ingabo z’u Rwanda (RDF).
Nyuma y’icyo cyemezo, Ishyirahamwe ry’Umukino wa Basketball mu Rwanda (FERWABA) ryemeje ko RSSB Tigers BBC ari yo isimbura APR BBC nk’ihagarariye igihugu muri iri rushanwa.
Ku mukino wa nyuma wabereye muri BK Arena, Petro de Luanda yatangiye yitwara neza kurusha RSSB Tigers BBC.
Mu minota ya mbere y’umukino, ikipe yo muri Angola yagaragaje ubukana bwinshi ndetse agace ka mbere karangira iyoboye n’amanota 20 mu gihe RSSB Tigers yari itarabasha kubona inota na rimwe.
Nyuma y’impinduka zakozwe n’umutoza wa RSSB Tigers BBC, Mwinuka Henry, iyi kipe yatangiye kwisuganya no kugabanya ikinyuranyo cy’amanota.
Igice cya mbere cy’umukino cyarangiye Petro de Luanda ikomeje kuyobora n’amanota 28 kuri 14 ya RSSB Tigers.
Mu gice cya kabiri, RSSB Tigers BBC yagarutse mu mukino n’imbaraga nyinshi, itangira kwegera mukeba wayo amanota ku yandi.
Umukino wakomeje kugenda urushaho gukomera, amakipe yombi asimburana mu kuyobora amanota kugeza mu minota ya nyuma.
Mu masegonda ya nyuma y’umukino, RSSB Tigers BBC yabashije gukomeza kurusha Petro de Luanda amanota make, irangiza yegukanye intsinzi ku manota 90 kuri 88, ihita yandika amateka mashya muri Basketball y’u Rwanda.
Umunyamerika Randall II wa RSSB Tigers BBC ni we watowe nk’umukinnyi wahize abandi muri BAL 2026 (MVP), nyuma yo kugira impuzandengo y’amanota 26 kuri buri mukino muri iri rushanwa.
Petro de Luanda yari yitabiriye buri kimwe mu byiciro bya BAL kuva ryatangira mu 2021.
Uyu wari umukino wa nyuma wa kane yari igezeho, nyuma yo kwegukana igikombe cya BAL mu 2024.
Intsinzi ya RSSB Tigers BBC yahesheje u Rwanda amateka mashya, kuko ibaye ikipe ya mbere yo mu gihugu ndetse no muri Afurika y’Iburasirazuba yegukanye igikombe cya BAL, irushanwa rihuza amakipe yabaye aya mbere iwayo muri Basketball ku mugabane wa Afurika.
Uyu mukino wa nyuma witabiriwe na Perezida wa Repubulika y’u Rwanda, Paul Kagame, wari waje gushyigikira RSSB Tigers BBC.
