Ubushinjacyaha kuri uyu wa 17 Kamena 2021 bwasabiye Paul Rusesabagina wabaye Perezida w’ihuriro mpuzamashyaka rya MRCD-Ubumwe gufungwa ubuzima bwose, mu gihe Nsengimana Herman wabaye umuvugizi w’umutwe witwaje intwaro wa FLN urishamikiyeho we yasabiwe gufungwa imyaka 20.
Rusesabagina utacyitabira urubanza rwe kuva muri Werurwe 2021, akurikiranweho ibyaha 9 bifitanye isano n’ibitero by’iterabwoba FLN yagabye mu turere twa Nyamagabe na Nyaruguru mu 2018 n’2019.
Ubushinjacyaha bwasobanuye ko impamvu bumusabira iki gihano ari uko ibyaha ashinjwa bigize impurirane y’icyaha.
Na Herman ushinjwa ibyaha birimo kwinjira kwinjira mu mutwe w’ingabo utemewe no kuba mu mutwe w’iterabwoba, yasabiwe iki gihano kubera ko bigize impurirane y’icyaha.
Aba bombi basabiwe ibihano nyuma y’aho Nsabimana Callixte (Maj. Sankara) na we wabaye Umuvugizi wa FLN, na we yasabiwe imyaka 25 y’igifungo kuri uyu wa 16 Kamena 2021.
Urukiko rukuru, urugereko rwihariye ruburanisha ibyaha by’iterabwoba n’ibyambukiranya umupaka ruri kubaburanisha, ni rwo ruzatanga umwanzuro ku gihano bahabwa mu gihe baba bahamijwe ibi byaha.
Kurikira ibiganiro n’amavidewo binyura kuri Bwiza TV
