Mu gihe hategerejwe abandi banyeshuri bazasubukura amasomo ku wa 23 Ugushyingo, basanga abandi bamaze ibyumweru 2 biga, abarezi n’abayobozi b’ibigo by’amashuri mu karere ka Rusizi baravuga ko batangiye kubunza imitima bibaza aho bazicara mu gihe intebe bicaragaho zicaweho na bagenzi babo baje mbere hakurikijwe amabwiriza yo kwirinda icyorezo cya COVID-19.
Bamwe mu barezi n’abayobozi b’ayo mashuri batangarije Umunyamakuru wa Bwiza.com ko mu kubahiriza amabwiriza yo kwirinda ikwirakwira rya COVID-19, bamwe mu banyeshuri bicajwe ari babiri babiri ku ntebe, abandi bicazwa umwe umwe, mu gihe mbere ya COVI-19 hari aho bicaraga ari 3 n’aho bageraga kuri 4 ku ntebe kubera ubucucike, bakibaza aho izindi zizava.
Mukankubito Vérène uyobora ishuri ribanza rya Kamembe Adiventisite yagize ati’’ Abana batangiye neza,amabwiriza yo kwirinda icyorezo cya COVID-19 arubahirizwa uko bigomba ariko ikibazo kidukomereye cyane ni icy’intebe abo dutegereje bazicaraho. Dufite amashuri 3 atarimo intebe n’imwe kandi hasigaye iminsi ibarirwa ku ntoki ngo abo bandi baze. Zibonetse byadufasha cyane nubwo guhamya ko zaboneka muri iyi minsi isigaye naba mbeshye ariko Akarere twakikagejejeho dutegereje icyo kazatubwira abo bandi twatangiye kubakira.’’
Mureramanzi Josué,umuyobozi wungirije ushinzwe amasomo mu ishuri ryigenga rya Friend school of Kamembe,we avuga ko kuri iki cy’intebe,impungenge zabo ari uko amashuri yigenga asanzwe yirwanaho ku bikoresho kandi biva mu mafaranga ababyeyi batanga ubu bakaba bavuga ko guma mu rugo y’igihe kirekire muri aka karere no kuba imipaka ifunze kandi abenshi bacungiraga imibereho muri RDC ngo babashe kubonera abana babo amafaranga y’ishuri,kubona intebe bikaba bizagorana.
Ati’’ Akarere sinzi niba hari intebe kazaduha kuko nta kindi gasanzwe kaduha ni ababyeyi byose tubicungiraho kandi ubu harishyura umugabo hagasiba undi kubera ubukene bataka bwaturutse kuri guma mu rugo y’igihe kirekire babayemo, abenshi imirimo igahagarara amafaranga y’ishuri akagora kuboneka, intebe ni ikibazo gikomeye cyane ntazi nanjye uburyo kizakemuka,tuzahuza ababyeyi turebe ko hari icyo badufashaho.’’
Mu rwunge rw’amashuri rwa Gihundwe B mu murenge wa Kamembe na ho iki kibazo kirahari nk’uko bitangazwa n’umuyobozi waryo Ntagwabira Silas uvuga ko abanyeshuri badashobora kwiga neza igihe bicaye nabi, ikibazo cy’intebe kikaba kiri mu mashuri yose yo mu karere yaba ayigenga n’aya Leta,impungenge zikaba ari zose ku buryo abana baziga badafite aho bicara.
Ati’’ Tuzabicaza ku zihe ntebe ko batazicara ari 3 nk’uko byahoze kandi tukaba tutabona batuzanira izindi mu gihe hasigaye icyumweru kimwe gusa ngo abandi baze? Ubu se mu cyumweru kimwe gusa, nubwo Akarere katwizeza ko ikibazo kakizi kandi kagikurikirana, zizazira rimwe cyangwa? Reka tubitege amaso ariko ntibyoroshye.’’
Yunzemo ati’’ Gifite uburemere bukomeye cyane kuko iyo abana bicaye nabi n’ubusanzwe biga nabi,noneho rero hakaziramo n’impungenge z’iki cyorezo bidusaba guhora ducunze ko bategerana. Jye na mbere y’iki cyorezo nari nasabye Akarere intebe zirenga 100 none hasigaye icyumweru kimwe ntarazibona. Turasaba Akarere kutajenjekera iki kibazo kuko kiri mu byatera impagarara mu mashuri igihe cyaba kidakemutse vuga abana bakaza bagisanga.’’
Umuyobozi w’aka karere wungirije ushinzwe imibereho myiza y’abaturage Nsigaye Emmanuel,avuga ko hari ba rwiyemezamirimo batsindiye amasoko yo kugeza intebe mu mashuri,akizeza ko abanyeshuri bazajya kuhagera ahenshi zihari.
Ati’’ Turagikurikiranira hafi, turizera ko ba rwiyemezamirimo batsindiye gukora izo ntebe no kuzigeza mu mashuri abana bandi bazaza ahenshi zarahageze, ariko amashuri yigenga yo bizasaba ko yigana n’ababyeyi iki kibazo bashake uburyo bacyikemurira ubwabo,kuko iby’ibikoresho nk’ibyo mu mashuri yigenga birebwa n’ishuri n’ababyeyi bayarereramo.’’
Akarere ka Rusizi kabarizwamo ibigo by’amashuri 197 birimo iby’abanza 123,ayisumbuye 61 na TVT 13. hafi ya byose bikaba bisangiye iki kibazo,byibaza uko bizabigenza ubwo abandi banyeshuri bazaba babisesekayeho.
