Rutshuru: FDLR irashinjwa kwica umushumba imuhoye ko ari umututsi ikarekura bagenzi be

Amakuru aturuka mu gace ka Bwiza muri Teritwari ya Rutshuru, muri Kivu y’Amajyaruguru mu burasirazuba bwa Repubulika ya Demokarasi ya Congo, aravuga ko hari umuntu wishwe n’inyeshyamba za FDLR na Nyatura zirangije zimuca umutwe zimuziza ubwoko bwe .

Aya makuru aravuga ko ibi byabaye kuwa Kane ushize, itariki 8 Ukuboza 2022, uwishwe akaba ari umushumba wo muri ako gace wicishijwe intwaro gakondo mbere yo kumuca umutwe.

Ihuriro ry’aborozi bo muri Kivu y’Amajyaruguru rivuga ko iyicwa ry’abaturage bo mu bwoko bw’Abatutsi batuye i Kichanga no mu nkengero zaho ari ibikorwa by’ihuriro rya FDLR-Nyatura bikomeje gufata intera kandi riziyongera niba hadafashwe ingamba zifatika byihutirwa. ”

Perezida w’iri huriro, Emmanuel Kamanzi, asobanura ko mbere yaho, inyeshyamba za FDLR zifite ibirindiro ahitwa Tabi zinjiye mu ifamu y’uwitwa Cyubahiro iherereye muri Bwiza maze zishimuta abashumba be batatu bakiri bato.

Nyuma yo kubagenzura nk’uko iyi nkuru dukesha Kivutimes ikomeza ivuga, inyeshyamba ngo zarekuye abashumba babiri nyuma yo kubona ko ari Abahutu, maze zijyana umushumba wundi w’Umututsi aho yiciwe.

“Mu gitondo ni bwo umurambo we, waciwe umutwe, wasanzwe muri rumwe mu nzuri zacu, ”ibi bikaba byavuzwe na Kamanzi, uvuga ko yatunguwe n’iki gikorwa.

Yakomeje agira ati “ Twongeye kubasaba kuza gutabara iyi communauté abanyamuryango bakomeje kwicwa n’abajenosideri bagejeje iyi ngengabitekerezo muri bamwe muri benewacu b’Abanyekongo. ”

Iyi nkuru ikaba ivuga ko uwishwe ari uwitwa Manuvo Jacques, wasize umupfakazi n’umwana.