Umutwe wa AFC/M23 watangaje ko abarwanyi b’umutwe wa FDLR usanzwe ukorana n’ingabo za Leta ya Repubulika Iharanira Demokarasi ya Congo (FARDC), bishe umugore n’abana batanu b’umukuru w’umudugudu wo mu gace ka Kabizo, muri Butare, muri Chefferie ya Bwito ho muri Teritwari ya Rutshuru.
Uyu mutwe wabiciye mu gitero wabagabyeho ku wa Kane tariki ya 2 Nyakanga, nk’uko AFC/M23 yabyemeje biciye muri Lawrence Kanyuka uyivugira.
Mu butumwa yanyujije ku rubuga rwa X, yavuze ko ubwo bwicanyi bwabaye ahagana saa tatu n’igice z’ijoro (21h30), bwibasira umuryango wa Rugamba, uyobora ako gace.
AFC/M23 ivuga ko abagizweho ingaruka n’ubwo bwicanyi ari Tuombe Maniragaba, umugore wa Rugamba, hamwe n’abana babo batanu ari bo Sifiwe Rugamba, Dorika Rugamba, Emeri Rugamba, Miriyamu Rugamba na Divine Rugamba.
AFC/M23 ivuga ko buriya bwicanyi bugaragaza ibikorwa by’ubugome FDLR ikomeje gukora, ndetse yanabugereranyije n’ibyabaye mu gihe cya Jenoside yakorewe Abatutsi mu Rwanda mu 1994.
Uyu mutwe waburiye abanye-Congo ko ubwicanyi bukomeje gukorwa na FDLR “bushyigikiwe kandi bugenzurwa” n’ubutegetsi bwa Kinshasa.
AFC/M23 yongeye gushimangira ko izakomeza kurinda abaturage no kubacungira umutekano ikoresheje uburyo bwose ibona bukenewe.
