Umutwe witwaje intwaro wa ARC (Armée Révolutionaire Congolaise) uzwi nka M23 watangaje ko wongeye kuva mu bice wari wafatiye mu mirwano yari ihanganyemo n’ingabo za RDC muri Teritwari ya Rutshuru.
Umuyobozi wa M23 ku rwego rwa politiki, Bertrand Bisimwa mu itangazo yashyize ahagaragara kuri uyu wa 10 Mata 2022, yasobanuye ko impamvu abarwanyi b’uyu mutwe bavuye muri ibi bice, ari ukugira ngo hashyirwe umukono ku masezerano ahuriweho yo guhagarika imirwano no kugira ngo habeho ibiganiro by’amahoro.
Bisimwa yagize ati: “Umutwe wa M23 wavuye mu birindiro bishya wafashe nyuma ya tariki ya 6 Mata 2022 kugira ngo habeho gushyira umukono ku masezerano ahuriweho yo guhagarika imirwano no gufungura ibiganiro.”
Iki cyemezo kinagaragara mu itangazo Umuvugizi wa M23, Major Willy Ngoma yashyize ahagaragara uyu munsi, wemeje ko uyu mutwe uteganya gushyikiriza umuryango w’ubutabazi Croix Rouge abasirikare ba Leta yafatiye mu mirwano.
Tariki ya 1 Mata 2022, M23 yari yafashe icyemezo bwite cyo guhagarika imirwano, ariko tariki ya 6 Mata itangaza ko ingabo za Leta zayigabyeho ibitero, yirwanaho, izisubiza inyuma.
Kuva uwo munsi kugeza kuri uyu wa 9 Mata, imirwano ya M23 n’ingabo za Leta yakomeje, uyu mutwe wigamba gufata uduce dutandukanye muri Rutshuru turimo: Gasiza, Gisiza, Bugusa, Bikenke, Kinyamahura na Rwambeho.
Utu duce M23 yafashe guhera tariki ya 6 Mata ni two yemeye kuvamo.
