Perezida Samia Suluhu Hassan wa Tanzania kuri uyu wa Mbere yashyizeho Guverinoma nshya, irimo umukobwa we ndetse n’umukwe we.
Muri iyi guverinoma, Wanu Hafidh umukobwa wa Samia Suluhu yagizwe Minisitiri wungirije w’uburezi, na ho umugabo we Mohamed Mchegerwa agirwa minisitiri w’Ubuzima.
Mchegerwa yari asanzwe ari Minisitiri mu biro bya perezida.
Samia kandi yashyizeho minisiteri itari isanzweho, Ministeri y’Ibireba Urubyiruko, nyuma y’imyigaragambyo y’urubyiruko mu matora yo mu kwezi gushize.
Perezida Samia yatsinze ayo matora ku majwi 98%, ibyo abatavuga rumwe n’ubutegetsi bwe bise “igisebo kuri demokarasi”.
Gushyira umukobwa we n’umukwe we muri guverinoma nshya birimo kuvugwaho cyane ku mbuga nkoranyambaga mu baturage ba Tanzania no mu karere.
Wanu Hafidh Ameir wavukiye muri Zanzibar mu 1982, azwi cyane muri Tanzania nk’umukobwa mukuru wa Samia Suluhu na Hafidh Ameir.
Wanu yakurikiye inzira ya nyina, aba umunyaporitike mu ishyaka CCM.Yabaye mu nama y’ubutegetsi y’iri shyaka ku rwego rw’igihugu, umwanya yarimo kuva mu 2010.
Yagiye ahabwa imirimo itandukanye ya poritike, kuva mu 2015 kugera mu 2018, yari umwe mu bagize komisiyo y’amategeko mu nteko ishinga amategeko.
Yabaye umukuru w’urubyiruko mu ishyaka CCM mu gace ko mu majyepfo y’ikirwa cya Zanzibar kuva mu 2008 kugeza mu 2012.
Wanu ni umukuru w’ikigo kitegamiye kuri leta Women’s Initiative Foundation (MIF), akaba ari na we wagitangije mu 2022 muri Zanzibar agamije gufasha kwiga abana bo mu miryango itishoboye.
Kuva mu 2005, Wanu Hafidh w’imyaka 43 ni umudepite uhagarariye ikirwa cya Zanzibar wo mu ishyaka Chama Cha Mapinduzi riri ku butegetsi.
Mu matora yo mu kwezi gushize, Wanu yagaragaye yamamaza nyina ngo atorwe nka perezida, ari na ko na we yiyamamaza ngo yongere atorerwe kuba umudepite.
