Ikipe ya Simba Sports Club yo muri Tanzania yirukanye umunya-Brésil Roberto Oliveira Gonà§alves do Carmo ‘Robertinho’ wari umutoza wayo mukuru.
Iyi kipe ibinyujije ku mbuga nkoranyambaga zayo, yatangaje ko yatandukanye n’uyu mutoza nyuma yo kugera ku bwumvikane bwo gusesa amasezerano bari bafitanye.
Robertinho w’imyaka 60 y’amavuko yari umutoza wa Simba kuva mu mwaka ushize wa 2022, ubwo yayigeragamo avuye muri Vipers yo muri Uganda.
Simba Sports Club yafashe icyemezo cyo gutandukana na we, nyuma y’uko ku wa Gatandatu w’icyumweru gishize yanyagiwe na mukeba wayo Young Africans ibitego 5-1, mu mukino wari uw’umunsi wa cyenda wa shampiyona ya Tanzania.
Ni umukino wasize iyi kipe ya kabiri ifite abafana benshi hariya itakaje umwanya wa mbere ifata uwa gatatu, n’ubwo igifite imikino ibiri y’ibirarane.
Usibye umutoza Robertinho, Umunyarwanda Hategekimana Corneille wari umwungirije na we amasezerano ye yasheshwe nk’uko iriya kipe yabyemeje.
Aba batoza bombi bashimiwe ku bw’akazi bakoreye Simba, mbere y’uko iyi kipe ibifuriza amahirwe masa ku handi bazerekeza.
Daniel Cadena wari umutoza w’abanyezamu ba Simba ni we wahise agirwa umutoza w’agateganyo w’iyi kipe, na ho Selemani Matola wahoze akinira iriya kipe agirwa umutoza wayo wungirije.
