Ingabo za Kenya (KDF), kuri uyu wa Kane zivuganye abarwanyi ba Al-Shabab 57 mu rugamba rwabereye hafi y’ahitwa Afmadow muri Somalia.
Iyi mirwano yabaye ku isaha ya saa 8:45 z’igitondo, yabereye mu birometero nka 31 uvuye Afmadow ahari ibirindiro by’ingabo za Kenya.
Umuvugizi w’ingabo za Kenya, Col. Joseph Owouth yatangaje ko umubare munini w’abarwanyi ba Al Shabab barokotse nabo bakomerekejwe.
Joseph Owouth yagize ati: “Ingabo za KDF zikorera muri AMISOM zacakiranye n’abarwanyi ba Al Shabab ahantu mu birometero 31 mu majyaruguru y’uburengerazuba bwa Afmadow, hafi ya centre ya Subow zikoresha intwaro ziremereye zinafashijwe n’imbunda yo kuri kajugujugu.”
[xyz-ihs snippet=”google-pub”]
Colonel Owouth yongeyeho ko imodoka 5 za pick-up ziriho imbunda nini za machine gun n’izindi ntwaro bya Al Shabab byangijwe nk’uko iyi nkuru dukesha Daily Nation ikomeza ivuga.
Yakomeje avuga ko ingabo za Kenya ziri maso kandi zizakomeza gukurikirana abarwanyi ba Al Shabab mu rwego rwo kwizera amahoro n’umutekano bya Kenya, ari nako zifasha Amisom mu bikorwa byo kugarura umutekano muri Somalia.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns./Bwiza.com
