Kuri uyu wa Gatanu, itariki 25 Mutarama , bagisohoka mu musigiti abaturage ba Sudani bahise basubira mu myigaragambyo mu mujyi wa Omdourman. Aho Polisi yifashishije ibyuka biryana mu maso igerageza kubatatanya.
Umuyobozi w’abatavuga rumwe n’ubutegetsi, Sadek al-Mahdi yavugiye ijambo mu musigiti agira ati: “ubutegetsi bugomba kuvaho bidatinze,” Nk’uko byatangajwe n’Ibiro Ntaramakuru by’Abafaransa, AFP.
Sadek al-Mahdi yemeje ko abantu barenga 50 bamaze kugwa mu myigaragambyo kuva igitangira ku italiki ya 19 y’ukwezi gushize. Leta ya Sudani yo ivuga ko abayipfiriyemo ari 30. Naho imiryango iharanira uburenganzira bwa muntu itanga umubare w’abantu 40 biciwe mu myigarambyo.
Sadek al-Mahdi ayobora ishyaka ryitwa al-Oumma, rimwe mu yakomeye atavuga rumwe n’ubutegetsi bwa Perezida Omar el Bashir. Yari minisitiri w’intebe watowe n’abaturage ubwo General Omar el-Bashir yamuhirikaga ku butegetsi muri coup d’Etat yo mu 1989.
Kugeza ubu, imyigaragambyo yakoreshwaga n’amashyirahamwe y’abanyamwuga atandukanye. Ni ubwa mbere ishyaka rya politiki ryifatanije n’aya mashyirahamwe. Abaturage bigaragambya basaba ko Perezida Bashir yegura.
Â
