Sosiyete z’indege n’abakozi bo ku bibuga by’indege muri Tanzania bagiye gutakaza akazi abandi bagabanyirizwe imishahara kugera kuri 50% kubera ibihombo byatewe n’icyorezo cya Covid-19 cyatumye ibi bigo bihagarika imirimo yabyo. Kompanyi za Precision Air na Air Tanzania zatangaje ko zigiye guhagarika amasezerano y’akazi kuri bamwe mu bakozi,abasigaye bakagabanyirizwa kuva kuri 30% kugeza 50% by’imishahara yabo mu gihe zikiri guhangana n’ibihombo byatewe n’icyorezo cya Coronavirus. Ibi byiyongeraho kompanyi ya Swissport Tanzania isanzwe itanga serivisi z’ubwikorezi bw’imizigo ku bibuga by’indege yatangaje ko izohereza mu kiruhuko kidahemberwa abakozi bayo babarirwa hagati y’ijana na mirongo itanu(150) na magana abiri(200)biganjemo abakoraga ku bibuga by’indege Mpuzamahanga bya Kilimandjaro (KIA) na Julius Nyerere kuko (JNIA) iyi kompanyi itagifite ubushobozi bwo kubahemba nk’uko umuyobozi wayo Mrisho Yassin yabwiye The Citizen dukesha iyi nkuru. Iki kigo gisanzwe gikoresha abakozi bagera ku 1000 ku bibuga by’indege bitandukanye muri Tanzania. Patrick Mwanri, Umuyobozi wa Precision Air isanzwe ikoresha abakozi basaga 400 yatangaje ko abakozi bose bamenyeshejwe ko bazakatwa 50% ku ngano y’imishahara bari basanzwe bahembwa. Icyorezo cya Covid-19 cyatumye ingendo z’indege ziza n’iziva muri Tanzania zihagarika ingendo zazo ku buryo zahuye n’ibihombo bikomeye zivuga ko bizagorana kongera kuziba icyuho byateje mu gihe iki cyorezo kimaze kwandura abantu 535 muri iki gihugu cyaba kitagabanyije ubukana. Si muri Tanzania gusa kuko Covid-19 yagize ingaruka ku bwikorezi bwo mu kirere kuri kompanyi zitandukanye muri Afurika zirimo Ethiopian Airlines na RwandAir y’u Rwanda.
