Mu nkambi y’Impunzi z’Abarundi zahungiye mu gihugu cya Tanzania hakozwe isakwa ry’ibikoresho bya gisirikare ndetse bimwe birahafatirwa na zimwe mu mpunzi zitabwa muri yombi .
Igipolisi cya Tanzania kuri uyu wa gatanu cyagaragaje ibyavuye mu isakwa ry’ibirwanisho ryari rimaze iminsi rikorwa mu nkambi y’impunzi z’Abarundi ya Mtendeli mu Ntara ya Kigoma.
Igipolisi cyavuze ko cyafashe ibikoresho birimo imbunda imwe n’igisasu cya grenade. Abantu 9 nabo batawe muri yombi n’igipolisi ku mpamvu z’iperereza .
Umukuru w’igipolisi mu kiganiro yagiranye n’itangazamakuru yaribwiye ko hafashwe ibintu bitari bicye biteye amakenga.
Igipolisi cyakomeje kivuga ko iki ari igikorwa gisanzwe cyo gucung umutekano w’Abatanzaniya ndetse n’uw’impunzi z’Abarundi ziri mu nkambi ya Mtendeli mu Ntara ya Kigoma. Ukuriye igipolisi akaba yavuze ko amategeko arengera impunzi yubahirizwa ariko ko mu gihe hagira uhamwa n’icyaha yazabihanirwa.
Umukuru w’igipolisi yagize ati: “Mu isaka n’ingenzura ryakozwe mu nkambi hafatiwemo ibintu bikurikira; ubwa mbere hafashwe igisasu gitezwa intoki cya grenade bita Grenade offensive, bafatanywe kandi imbunda imwe, umupanga umwe, inkweto z’abakobwa ziteye amakenga, telephone 4 zo mu bwoko bwa Nokia.”
Yakomeje avuga ko intumbero ari ugukomeza isaka nk’iri ku bufatanye n’abahagarariye inkambi y’impunzi nk’uko iyi nkuru dukesha Ijwi rya Amerika ikomeza ivuga.
[xyz-ihs snippet=”google-pub”]
Uyu muyobozi w’igipolisi yaboneyeho kubwira impunzi z’Abarundi zose ko leta ya Tanzania yabakiriye nk’impunzi kuko yubaha uburenganzira bwa muntu ariko kandi ngo yubahiriza amategeko mpuzamahanga.
Iyi nkambi y’impunzi ya Mtendeli igipolisi kivuga ko cyafatiyemo ibirwanisho, icumbikiye impunzi zisaga 50,000, ikaba ihana imbibe n’Intara za Cankuzo na Ruyigi zo mu Burundi, aho abayirimo bavuga ko bafite ubwoba bwinshi kuko batazi icyo ibyo birwanisho byari bigamije, aho bakeka ko hashobora kuba hari n’abandi bantu baturuka hanze y’inkambi bakinjiramo bihishe.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns./Bwiza.com
