Rutahizamu Meddie Kagere ukinira ikipe y’igihugu Amavubi, yahembwe nka rutahizamu wahize abandi muri shampiyona ya Tanzania, anashyirwa mu kipe y’abakinnyi 11 beza baranze iyo shampiyona mu mwaka w’imikino ushize.
Kagere ni umwe mu bafashije Simba Sports Club kwegukana igikombe cya shampiyona, nyuma yo kuyitsindira ibitego 21 mu mikino ya shampiyona.
Igihembo cya rutahizamu w’umwaka yahawe ni icya kabiri kikurikiranya yegukanye kuva yagera mu kipe ya Simba SC, dore ko no mu mwaka ushize ari we wari wagitwaye nyuma yo gutsinda ibitego 23 muri shampiyona ya Tanzania.
Umunya Zambia Clatous Chata Chama ukinana na Kagere muri Simba SC ni we wahembwe nk’umukinnyi w’umwaka, Umubiligi uyitoza, Sven Vandenbroeck we ahembwa nk’umutoza w’umwaka.
Undi wo muri Simba SC wahembwe ni umuzamu wayo Aishi Manula watowe nk’umuzamu w’umwaka.
Abakinnyi bagize ikipe ya 11 beza ba shampiyona ya Tanzania biganjemo aba Simba SC ifitemo batandatu, bakaba barimo umuzamu Aishi Manula (Simba SC), David Luhende (Young Africans), Nicolaus Wadada (Azam FC), Bakari Nondo (Young Africans) Pascal Wawa (Simba SC) Zawadi Mauya (yakiniraga Kagera Sugar mbere yo gusinyira Young Africans) Lucas Kikoti (Namungo FC) Clatous Chama (Simba SC), Meddie Kagere (Simba SC) John Rafael Bocco (Simba SC ) na Luis Muiquissone wa Simba Sports Club.
