Inyeshyamba zo mu mutwe wa TPLF wo muri Tigray zamaze kwihuza n’inyeshyamba ziharanira kubohoza intara ya Oromo (Oromo Liberation Army) bagamije guhirika ubutegetsi bwa Ethiopia, bushinja iyi mitwe yombi kuba inyuma y’ubwicanyi bw’abasivili ibihumbi muri Oromo na Benishangul Gumuz.
Kuri uyu wa gatatu ushize uyu mutwe uharanira kubohoza Oromo watangarije Associated Press ko wifatanyije na TPLF hagamijwe intego imwe bahuriyeho yo guhirika Guverinoma ya Addis Abeba.
Uwitwa Kumsa Driba, na none bita Jal Mero, wagaragajwe nka Komanda wa OLA, avuga ko kugirango bahirike ubutegetsi bwa Addis Abeba basanze bagomba guhuza ingufu na TPLF na yo iharanira ubwigenge bw’intara ya Tigray.
Si ubwa mbere imitwe yombi yaba ifatanyije. Mu gihe cyahise, iyi mitwe yombi n’ubundi yigeze guhuza imbaraga za gisirikare na politiki. Mbere yo guhirika ubutegetsi bwa Col. Mengistu Hailemariam mu 1991, imitwe yombi yarihuje ariko uko kwishyira hamwe ntikwamara kabiri.
Abanya-Oromo bahise bashwana n’Abanya-Tigray (TPLF) nyuma y’umwaka umwe gusa “Ethiopian People’s Revolutionary Democratic Front”, yari ihuriyemo amashyaka ane; Tigray People’s Liberation Front (TPLF) yari yiganje, Amhara Democratic Party (ADP), Oromo Democratic Party (ODP) na Southern Ethiopian People’s Democratic Movement (SEPDM), ifashe ubutegetsi mu 1991.
Iri shyaka ryo muri Oromo rimaze igice cy’ikinyejana ryahise rihunga riva mu murwa mukuru rijya gutangiza ibikorwa bya guerilla mu majyepfo y’uburasurazuba bwa Ethiopia, ariko ibi nabyo ntibyarihira kuko ryahise rikubitwa inshuro na guverinoma yari iyobowe na TPLF kuri uyu munsi byifatanyije mu rugamba bwo guhirika abakuye TPLF ku butegetsi.
Kurikira ibiganiro n’amavidewo binyura kuri Bwiza TV
