Rais wa Marekani Donald Trump amewaudhi raia wa Jamhuri ya Kidemokrasia ya Congo baada ya kudai kwamba hajui “Congo” ni nini, isipokuwa kwamba watu wengi kutoka huko wanaingia Marekani.
Trump alitoa kauli hiyo Jumatatu wakati wa mazungumzo na Waziri Mkuu wa Italia, Giorgia Meloni, kuhusu suala la uhamiaji. Alidai kuwa mataifa mbalimbali duniani yanafungua magereza na kuwaachia wahalifu ambao wanaelekezwa Marekani — akilitaja moja kwa moja Congo.
Trump alisema: “Unajua Giorgia, wamefungua magereza kote duniani — si Amerika Kusini pekee, bali kila mahali, Congo, Afrika, watu wengi, wengi wanatoka Congo. Sijui ni nini hicho, lakini wanatoka Congo.”
Katika mji mkuu wa Kinshasa, ambako wananchi tayari wanakabiliwa na changamoto za kiuchumi, kauli hizo ziliwakera zaidi hasa wakati nchi yao inatafuta usaidizi kutoka Marekani kusaidia kurejesha amani mashariki mwa taifa hilo.
Jonathan Bawolo, mkazi wa Kinshasa, aliambia Africanews: “Nchi yetu, Jamhuri ya Kidemokrasia ya Congo, ni nchi nzuri iliyopo katikati ya Afrika. Tuna utajiri mkubwa na tunapenda wageni. Hatufanyi watu wageni vitisho mitaani. Kauli ya Trump inaonesha picha potofu ya Congo ambayo si kweli kwa maisha yetu ya kila siku.”
Ingawa DRC inakumbwa na matatizo ya kiuchumi na kisiasa, bado ni moja ya mataifa yenye utajiri mkubwa wa rasilimali duniani kama cobalt, shaba, na lithium — ambazo ni muhimu sana katika sekta za teknolojia na nishati.
Si mara ya kwanza kwa Trump kutoa matamshi ya kuudhi kuhusu Afrika. Mwaka jana Machi, alibeza Lesotho akisema ni nchi isiyojulikana, na kukosoa misaada ya Marekani kwa mataifa kama hayo. Pia, aliwahi kusema kiongozi pekee wa Kiafrika anayemheshimu ni Rais Paul Kagame wa Rwanda.
