Perezida Donald Trump wa Leta zunze ubumwe za Amerika, yavuze ko we n’umugore we, Melania Trump, banduye icyorezo cya Covid-19, bakaba bahise bajya mu kato.
Perezida Trump yemeje ko yanduye kiriya cyorezo mu butumwa yanyujije ku rubuga rwe rwa Twitter, nyuma y’uko umwe mu bantu ba hafi ye asanzwemo kiriya cyorezo.
Uwo ni Hope Hicks w’imyaka 31 y’amavuko, Umujyanama wa Perezida Trump. Amakuru y’uko yanduye Covid-19 yemejwe na Perezida Trump ku wa Kane w’iki cyumweru, yongeraho ko we na Melania bategereje ibisubizo byabo.
Aba bombi bari kumwe mu ndege mu ntangiriro z’iki cyumweru ubwo Perezida Trump yerekezaga i Ohio, aho yakoreye ikiganiro mpaka na Joe Biden bazaba bahanganye mu matora y’umukuru w’igihugu. Bamwe mu bagize umuryango wa Trump bitabiriye kiriya kiganiro bagaragaye batambaye udupfukamunwa.
Perezida Trump kuri Twitter yagize ati: “Iri joro Melania nanjye twasanzwemo Covid-19. Turahita duratangira akato kacu n’urugendo rwo gukira.”
Sean Conley, umuganga wa Perezida Trump, yasohoye itangazo rivuga ko Trump na Melania bombi bameze neza, bakaba bateganya kuguma mu rugo muri White House mu gihe bagitegereje gukira neza.
Yunzemo ati: “Mfite icyizere cy’uko Perezida azakomeza inshingano ze nta kirogoya mu rugendo rwe rwo gukira, kandi ibiri bube byose ndaza kubibamenyesha.”
Ntibiramenyekana niba ukwandura kwa Perezida Trump bishobora guhungabanya ikiganiro mpaka cya kabiri azagirana na Joe Biden, kizabera i Miami muri Leta ya Florida ku wa 15 z’uku kwezi.
