Kuri uyu wa Kane, itariki 23 Kamena, Igipolisi cya Tunisia cyataye muri yombi uwahoze ari Minisitiri w’Intebe, Hamadi Jebali, wahoze ari umuyoboke mukuru mu ishyaka rya kisilamu rya Ennahda, akekwaho kunyereza amafaranga, nk’uko umwunganizi we yabitangarije Reuters.
Polisi yo mu mujyi wa Sousse yafashe terefone ya Jebali na terefone y’umugore we imujyana ahantu hatazwi nk’uko byatangajwe n’umuryango we kuri Facebook.
Ifatwa rya Jebali rikaba ryazamuye impungenge z’abatavuga rumwe n’ubutegetsi ku burenganzira bwa muntu kuva Perezida Kais Saied yikubira ubutegetsi bwose mu mwaka ushize, ibyo abamurwa bise guhirika ubutegetsi.
Minisiteri y’umutekano w’imbere mu gihugu yanze kugira icyo ivuga ku ifatwa rya Jebali ariko ihamagaza ikiganiro n’abanyamakuru kuri uyu wa Gatanu, nta bisobanuro birambuye.
Itsinda ry’abunganira Jebali ryatangaje ko bamusanze aho afungiye mu gihe iperereza rikomeje.
Umwunganizi wa Jebali, Mokhtar Jemai yagize ati: “Jebali yatubwiye ko atazasubiza ibibazo by’abashinzwe iperereza maze atangira kwiyicisha inzara kuko iki kibazo gifite intego ya politiki kandi ntaho gihuriye no kunyereza amafaranga”.
Ennahda ni ryo shyaka ryari rikomeye mu Nteko Ishinga Amategeko ya Tunisia mbere y’uko Perezida Kais Saied asesa inteko kandi akikubira ubutegetsi mu mwaka ushize, igikorwa iri ishyaka ndetse n’abandi banenga ubutegetsi bafata nko guhirika ubutegetsi. Saied yavuze ko iki cyemezo ari icy’igihe gito kandi ko cyari gikenewe kugira ngo Tunisia ikizwe ruswa no kwikorera ku giti cyabo kwa bamwe mu bayobozi.
Jebali yabaye Minisitiri w’Intebe wa Tunisia mu 2012, maze yegura mu 2013 kubera ibibazo bya politiki muri iki gihugu.
Mu ntangiriro z’uyu mwaka, igipolisi cyataye muri yombi Visi Perezida w’ishyaka Ennahda, Noureddine Bhiri, kimumarana amezi abiri mbere yo kumurekura nta cyaha ashinjwe.
Perezida Saied ashinjwa gukoresha igipolisi n’ubucamanza mu kwibasira abatavuga rumwe nawe, ariko akabihakana ashimangira ko atari umunyagitugu.
