Kuri uyu wa Gatatu mu Bufaransa, abantu 208.000 basanzwemo Covid-19 mu masaha 24, akaba ari umubare wo hejuru w’abanduye mu munsi umwe muri iki gihugu kuva iki cyorezo cyaduka.
Abantu binjira mu bitaro buri munsi kubera Covid mu Bufaransa bari ku mpuzandengo y’1.000 ku munsi, umubare wari hasi ugereranyije na 3.500 mu binjiraga mu bitaro mu nkundura ya mbere muri Mata 2020 cyangwa hafi 3.000 mu nkundura ya kabiri mu Gushyingo umwaka ushize.
Ariko ubwiyongere bukabije mu mibare bwateye impungenge nk’uko iyi nkuru dukesha RFI ikomeza ivuga.
Ku wa kabiri, ihuriro ry’ibitaro mu Bufaransa ryatangaje ko “hakenewe izindi ngamba mu rwego rwo kurinda ibitaro bya Leta kugira ngo harindwe serivisi z’ubuzima n’ibitaro zihutirwa byanze bikunze kuko ibikorwa byinshi bishobora guhagarikwa.”
Ibitaro byinshi, cyane cyane biri mu turere dushyushye two mu Bufaransa no ku nkombe y’amajyepfo ya Mediterane, bimaze guhagarika ibikorwa bitari ngombwa kubera ubwiyongere bwa Covid, yibasira ahanini abantu badakingiwe.
N’ubwo u Bufaransa ari kimwe mu bihugu bifite abaturage benshi bujuje ibisabwa babonye urukingo ku Isi bangana na 90%, haracyari abantu bagera kuri miliyoni 5 batarakingirwa bakuze bihagije.
