Inzego z’ubuzima mu Buhinde kuri uyu wa 23 Gicurasi 2021 zaraye zitangaje ko icyorezo cya Covid-19 kimaze kwica abantu 50,000 mu byumweru bibiri gusa.
Ni umubare wazamuwe n’abishwe n’iki cyorezo 4452 kuri uyu munsi, ukaba ari uwa kabiri munini cyishe muri iki gihugu, ku munsi umwe.
Abantu benshi bishwe na Covid-19 mu munsi umwe ni 4,529, bakaba barabonetse ku wa Gatatu w’icyumweru gishize nk’uko ibiro ntaramakuru by’Abanyamerika, Associated Press byabitangaje.
Mu itangwa ry’izi raporo kandi, bivugwa ko hashobora kuba hari abicwa n’iki cyorezo, ntibatangazwe bitewe ahanini n’aho baba bapfiriye. Urugero: Abapfiriye mu ngo zabo bamenyekana hashize igihe.
Kuva Covid-19 yagera mu Buhinde, imaze guhitana ababarirwa mu 303,000 barimo 102, 533 bapfuye mu minsi 26 ishize; kikaba ari igihugu cya gatatu ku Isi kimaze gupfusha benshi bazize iki cyorezo.
Abamaze kwandura Covid-19 muri iki gihugu gituwe n’abaturage miliyari 1.39, bo barabarirwa muri 26,799,070.
