Ubuyobozi bw’Intara ya Kirundo mu izina rya Leta y’u Burundi bwirukanye abandi Banyarwanda 12 bari barahunze urukingo rwa Covid-19 bavuga ko rudahura n’imyemerere yabo y’iyobokamana.
Aba Banyarwanda barimo abagabo batandatu, abagore batanu n’umwana umwe bamaze iminsi itanu mu gace ka Nyakarama, Zone ya Kiyonza muri Komini Bugabira.
Mu makosa bashinjwa harimo kwambuka mu buryo butemewe no kutubahiriza amabwiriza yo kwirinda Covid-19 mu gihe bari mu Burundi kuko ngo ntibanemera kwambara agapfukamunwa.
Umuyobozi w’Intara ya Kirundo, Albert Hatungimana yavuze ko u Burundi butacumbikira uwinjiyeyo muri ubu buryo kandi ntakurikize aya mabwiriza, naho ngo uwakwemera kubacumbikira yaba ari umwanzi w’igihugu.
Nk’uko urubuga SOS rubivuga, Hatungimana yagize ati: “Uzemera gucumbikira abantu baje muri ubu buryo, azafatwa nk’umwanzi w’igihugu.”
Ntabwo barataha, gusa kuri uyu wa 5 Mutarama 2022 basabwe kwitegura, bakagaruka mu Rwanda.
Aba Banyarwanda biyongereye ku bandi 9 barimo 8 u Burundi bwirukanye nyuma yo guhungirayo urukingo rwa Covid-19, bavuga ko ari urwa Anti-Kristo, ngo aho kwikingiza bakwemera bagapfa.
