Abayobozi ba gisivili n’abasirikare baravuga ko igitero cya Ukraine kirimo indege zitagira abaderevu nyinshi cyahagaritswe mu mujyi wa Kurchatov mu Burusiya, ahari urugomero rw’ingufu za nikeleyeri rwa Kursk. Amakuru ataremezwa yavuze ko imwe mu ndege yangije ububiko bw’imyanda ya nikeleyeri.
Ibi byabereye kuri uyu wa Kane ushize nimugoroba mu karere ka Kursk gahana imbibi na Ukraine. Minisiteri y’ingabo y’u Burusiya yatangaje ko yarashe indege zitagira umudereva mu kirere cy’u Burusiya inshuro ebyiri, hagati y’amasaha abiri, mu gihe ibiro bishinzwe itangazamakuru by’urugomero rw’amashanyarazi akomoka ku ngufu za nikeleyeri byavuze ko rwibasiwe n’indege zitagira abaderevu eshatu. Kurchatov iherereye nko muri kilometero 60 uvuye ku mupaka wa Ukraine.
Iri tangazo ry’abayobozi ba gisivili ryatangaje ko nta byangiritse cyangwa abahitanwe n’icyo gitero, rinavuga ko ibice bine byose by’uruganda biri gukora bisanzwe.
Ikinyamakuru SHOT cyatangaje ko ibyabaye byari bikomeye kuruta uko byatangajwe n’abayobozi, aho kivuga ko drone ya gatatu “yaguye iruhande rw’ububiko bw’imyanda ya nikeleyeri igaturika.”
Bivugwa ko guturika kwangije bidakomeye aho kwabereye ariko nta muntu wakomeretse.
Ikindi kibazo cy’indege zitagira abapilote cyabaye muri Kurchatov gishobora kuba kwari ukugerageza gutera uruganda rw’ingufu cyavuzwe hagati muri Nyakanga.
Icyo gihe ibitangazamakuru byatangaje ko drone, yakorewe mu gihugu ariko ifite moteri yakorewe muri Taiwan, yaturikiye mu birometero byinshi uvuye ahatunganyizwa ingufu za kirimbuzi ngo zikurwemo amashanyarazi.
