Minisitiri w’ingabo z’u Burusiya, Sergei Shoigu, yategetse abasirikare bari inyuma y’umugezi munini wa Dnieper uherera ku ruhande rw’intara ya Kherson kuhava ku mpamvu y’umutekano wabo, uw’ibikoresho byabo ndetse n’uw’abasivili.
Ni icyemezo yafashe nyuma yo kuganira kuri uyu wa 9 Ugushyingo 2022 na komanda w’ingabo z’u Burusiya ziri kurwanira muri Ukraine, General Sergei Surovikin. Ni ikiganiro cyari cyerekeye ku mpungenge zo gukorera inyuma y’uyu mugezi (ku nkombe y’iburyo).
Surovikin yasobanuriye Shoigu ko mu gihe ingabo za Ukraine zarasa ku bigega by’amazi biri ku kidendezi cya Kakhovka, byatuma hatemba amazi menshi, akaba yakwica abasivili, bikagira ingaruka ku mikorere y’ingabo z’u Burusiya ziri ku nkombe y’iburyo.
Uyu musirikare yakomeje agira ati: “Muvandimwe Minisitiri w’ingabo, nyuma yo kugenzura byuzuye ikibazo kiriho, igitekerezo twagize ni ugukorera ibikorwa byacu ku nkombe y’ibumoso y’umugezi wa Dnieper. Ndabyumva ko ari icyemezo kitoroshye. Na none, turarinda ubuzima bw’abasirikare bacu ndetse n’ubushobozi bwo kurwana kw’amatsinda yacu, kandi ntibyashoboka ku duce duke two ku nkengero y’iburyo.”
Nk’uko ibiro ntaramakuru by’Abarusiya (TASS) byabitangaje, Shoigu amaze kumva iyi mpungenge, yagize ati: “Nimutangire mukure abasirikare inyuma ya Dnieper, kandi mufate ingamba zose zatuma bimuka kandi bakahagura intwaro n’ibindi bikoresho ku mutekano. Kuri twebwe, ubuzima bw’ingabo z’u Burusiya ni ingenzi. Tugomba no kwirinda ibyahungabanya abasivili.”
Gen. Surovikin yemeza ko kuva ku nkombe y’iburyo y’umugezi wa Dnieper ari igihombo ku Burusiya kuko hari ahantu h’ingenzi habafashaga kugaba ibitero ku ngabo za Ukraine mu buryo bworoshye.
