Minisiteri ishinzwe ubutabazi mu Burusiya yavuze ko indege yari itwaye itsinda ry’abasimbukira mu mitaka yakoze impanuka nyuma yo guhaguruka mu karere ka Tatarstan mu Burusiya mu gitondo cyo ku Cyumweru, ihitana abantu 16 abandi batandatu barakomereka.
Minisiteri ishinzwe ubutabazi mu Burusiya yashyize ahagaragara aya makuru yavuze ko abantu 22 ari bo bari bari muri iyi ndege yo mu bwoko bwa L-410 Turbolet.
Mu bakomeretse barindwi kandi nk’uko minisiteri yakomeje ibitangaza, umwe muri bo niwe urembye.
Ibiro Ntaramakuru by’Abongereza, Reuters byavuze ko ubwo indege yari igeze muri metero 70, abapilote batangaje ko moteri y’ibumoso ifite ikibazo kandi bagerageza kugwa byihutirwa hafi y’umujyi wa Menzelinsk, bagerageza guhindura indege ibumoso kugira ngo birinde ahantu hatuwe, nk’uko guverineri w’akarere yabitangaje.
Mu gihe bivugwa ko u Burusiya bwateje imbere amategeko ajyanye n’umutekano wo mu kirere biciye mu kugenzura cyane inenge, indege zo muri iki gihugu zikunze gukora impanuka.
Muri uku kwezi gushize indi ndege yo mu bwoko bwa Antonov yakoze impanuka ihitana abantu batandatu, mu gihe indi yakoze impanuka muri Nyakanga yahitanye abantu 28 bose bari bayirimo.
