U Bushinwa bwagotesheje Taiwan amato y’intambara yabwo nyuma y’uruzinduko rwa Pelosi

Kuri uyu wa Kabiri, Minisiteri y’Ingabo y’u Bushinwa yatangaje ko ingabo zayo zizakora imyitozo hamwe n’igerageza rya misile hirya no hino mu nkengero za Taiwan mu rwego rwo gusubiza uruzinduko rwa Perezida w’Inteko Ishinga Amategeko ya Leta Zunze Ubumwe za Amerika, Nancy Pelosi, wageze muri Taiwan kuwa Kabiri, nyamara yari yihanangirijwe na Beijing.

Minisiteri y’ingabo yavuze ko “ibikorwa bya gisirikare biteganyijwe” bigamije “kurengera ubusugire bw’igihugu” mu rwego rwo gusubiza uruzinduko rwa Pelosi, nk’uko Minisiteri y’ingabo yabitangaje kuri uyu wa Kabiri, yemeza ko “izaburizamo byimazeyo kwivanga kw’amahanga ndetse n’ubwigenge bwa Taiwan.”

Impuguke zikaba zagaragaje impungenge z’iyi imyitozo, bamwe bavuga ko ishobora no gukorerwa mu mazi ya Taiwan nk’uko tubikesha ikinyamakuru Politico. Taylor Fravel, umuyobozi wa gahunda y’ubushakashatsi mu by’umutekano ya Kaminuza y’Ikoranabuhanga ya Massachussets, MIT, yavuze ko iyi myitozo isa nk ‘“itarigeze ibaho,” avuga ko ari “umubare munini w’imyitozo izakorerwa hafi y’Ikirwa cya Taiwan ubwacyo, kandi ikaba iya mbere igiye kubera ku mpande zose zikikije Taiwan.

Fravel yavuze ko imyitozo ishobora no kugaragaramo misile z’Abashinwa zica hejuru ya Taiwan.

Minisiteri y’ingabo muri Taiwan yatangaje ko mu bundi bushotoranyi, indege 21 z’intambara z’u Bushinwa zinjiye mu kirere cy’ubwirinzi cya Taiwan.

Abayobozi ba Amerika ariko, bemeje ko iterabwoba ry’u Bushinwa kuri Pelosi, harimo n’igitekerezo cy’uko indege ye ishobora kuraswa, nta kindi ryari rigamije uretse amayeri yo gutera ubwoba.