Ambasade y’u Bushinwa muri Repubulika ya Demukarasi ya Congo (RDC) yahakaniye ikigo gishinjwa guha intwaro imitwe y’inyeshyamba ikorera mu burasirazuba bw’iki gihugu cyo ku mugabane wa Afurika.
Mu itangazo ryo kuri uyu wa 6 Nyakanga 2022, iyi Ambasade yasobanuye ko yabonye amakuru akwirakwira ku mbuga nkoranyambaga, avuga ko ikigo cy’Abashinwa cyitwa Xinxing Group giha intwaro inyeshyamba zikorera muri RDC.
Iyi Ambasade ivuga ko yubaha icyemezo akanama k’Umuryango w’Abibumbye gashinzwe umutekano kafashe cyo guhagarikira iyi mitwe irwanya Leta ya RDC uburyo bwo kwakira intwaro, kandi ngo nta kigo na kimwe cyo mu Bushinwa cyemerewe gukorana n’izi nyeshyamba.
Iti: “Ambasade y’u Bushinwa irashimangira ko u Bushinwa bwubaha imyanzuro y’akanama k’Umuryango w’Abibumbye gashinzwe umutekano ku bihano byerekeye iyoherezwa ry’intwaro ku mitwe yitwaje intwaro irwanya Leta, ikorera mu burasirazuba bwa RDC. Nta kigo cyo mu Bushinwa cyemerewe gukorana n’imitwe yitwaje intwaro yo muri iki gihugu.”
Yongereyeho iti: “U Bushinwa bwubaha ubusugire bwa RDC, kutavogerwa k’ubutaka bwayo n’umutekano wayo. Ntibwigeze kandi ntibuzigera buha imitwe yitwaje intwaro itemewe iri ku butaka bwa RDC intwaro cyangwa ibindi bikoresho bya gisirikare.”
Ubusanzwe ikigo Xinxing Group gitanga ibikoresho bw’ubwubatsi. Gishinjwe gufasha inyeshyamba mu gihe imirwano hagati y’ingabo za Leta ya RDC na M23 ikomeje gukaza umurego muri teritwari ya Rutshuru, mu ntara ya Kivu y’Amajyaruguru.
