Ikigo cy’u Rwanda gishinzwe ubuzima, RBC, cyatangaje ko gahunda yo gukingira Covid-19 mu gihugu hose igiye gukomeza kuri uyu wa Gatandatu, tariki ya 29 Gicurasi 2021.
Ni nyuma y’aho u Bufaransa buhaye iki gihugu doze 117,600 z’inkingo za AstraZeneca, ziyongera ku zindi cyari cyarahawe muri gahunda ya Covax igamije kugeza inkingo mu bihugu biri mu nzira y’iterambere.
RBC yagize iti: “U Rwanda rwakiriye izindi doze za AstraZeneca zigera ku 247,000 binyuze mu bufatanye bw’ibihugu bugamije gukwirakwiza inkingo za Covid-19 ku Isi, COVAX, izo doze kandi zikaba zirimo izigera ku 117,600 zabonetse ku bufatanye na Guverinoma y’igihugu cy’u Bufaransa.”
Izi nkingo zatanzwe n’u Bufaransa zazanywe na Perezida wabwo, Emmanuel Macron, ubwo yageraga mu Rwanda kuri uyu wa 27 Gicurasi 2021, mu ruzinduko rw’iminsi ibiri rurebana n’umubano w’ibihugu byombi.
Iki kigo gisobanura ko abahawe doze ya mbere y’urukingo rwa Covid-19 ari bo baribandwaho muri iyi gahunda yasubukuwe. Kiti: “Hagamijwe cyane cyane gutanga urukingo rushimangira ku bari bahawe urukingo rwa OXFORD-AstraZeneca (doze ya kabiri).”
U Rwanda rwahawe inkingo za mbere za Covid-19 zigera ku 342,960 zirimo 240,000 za AstraZeneca tariki ya 3 Werurwe 2021. Hari izindi 50,000 za AstraZeneca rwahawe n’u Buhinde tariki ya 6 muri uko kwezi.
RBC ivuga ko igikorwa cy’ikingira cyasubitswe u Rwanda rumaze gukingira abantu bagera ku 350,400.
