U Rwanda ibihugu bine byo mu birwa bya Carraïbes imfashanyo ingana na $ miliyoni 1.2 (arenga Frw miliyari 1.5), nk’imfashanyo yo kubigoboka kubera imvura y’amahindu idasanzwe yiswe Beryl yabyibasiye mu kwezi gushize.
Minisiteri y’Ububanyi n’Amahanga ndetse n’Ubutwererane yatangaje ko buri gihugu muri ibi bine byahawe imfashanyo ya $300,000.
Birimo Grenada, Jamaica, Barbados na St. Vincent & The Grenadines.
The New Times yasubiyemo MINAFFET ivuga iti: “U Rwanda rwasubije ku busabe bwo guterana ingabo mu bitugu bwatanzwe n’Umunyamabanga Mukuru wa Commonwealth asaba ko ibihugu bya Commonwealth byibasiwe n’imvura y’amahindu ya Beryl byafashwa”.
“Ni muri urwo rwego, amafaranga angana na $ miliyoni 1.2 yahawe Grenada, Jamaica, Barbados cyo kimwe na St. Vincent & the Grenadines.”
Imfashanyo u Rwanda rwahaye buriya bihugu ije ikurikira iya toni 2,000 z’ibigori rwahaye ibihugu bya Zambia na Zimbabwe byo byibasiwe n’amapfa.
Minisiteri y’Ububanyi n’Amahanga yavuze ko u Rwanda rwiteguye gukomeza gufasha mu bushobozi bwarwo ibihugu by’Isi byibasiwe n’ibiza bikomeye ndetse n’ingaruka z’ihindagurika ry’ikirere, nk’uko mu bihe byashize rwagiye rubikora mu karere ndetse n’ahandi.
Imvura y’amahindu ya Beryl yibasiye ibihugu bya Mexique, Leta Zunze Ubumwe za Amerika ndetse n’ibihugu byinshi byo mu birwa bya Carraïbes.
Iyi mvura yarimo umuyaga ufite umuvuduko wa Kilometero zibarirwa muri 200 ku isaha, yatwaye ubuzima bw’abatari bake inangiza imitungo ifite agaciro k’abarirwa muri za miliyari z’amadorali.
Beryl ifatwa nk’imwe mu nkubi z’umuyaga zikomeye zibasiye kiriya gice kuva muri 2007, ubwo cyibasirwaga n’indi yahawe izina rya Dean.
