Minisiteri ishinzwe ibikorwa by’ubutabazi mu Rwanda (MINEMA) yatangaje ko iki gihugu cyaraye cyakiriye Abanyekongo barenga 3500 bahungaga iruka ry’ikirunga cya Nyiragongo.
Iyi Minisiteri yatangarije ku rubuga rwa Twitter mu masaa sita y’uyu wa 23 Gicurasi 2021 iti: “Rubavu, u Rwanda rwakiriye Abanyekongo barenga 3500 bashakaga ubuhungiro bitewe n’iruka ry’ikirunga cya Nyiragongo.”
Ikirunga cya Nyiragongo cyatangiye kuruka ku mugoroba wo kuri uyu wa 22 Gicurasi 2021, cyerekeza mu majyaruguru y’uburasirazuba, muri Gurupoma ya Kibumba.
Abatuye mu mujyi wa Goma uherereye muri Teritwari ya Nyiragongo, bagize ubwoba, batangira guhungira mu Karere ka Rubavu mu Rwanda, mu mirenge ibegereye irimo Cyanzarwe na Rubavu, banyuze ku mupaka.
Ku rundi ruhande, ubuyobozi bwo muri RDC bwasabaga abaturage b’i Goma guhungira mu burengerazuba bw’umujyi, nk’i Sake, bunabizeza ubufasha bwo kubimura mu gihe ikirunga cyaruka cyerekeza aho batuye, nk’uko itangazo ry’Umuvugizi wa Guverinoma, Patrick Muyaya ryabivuze.
Amakuru yatanzwe n’abakozi b’Umuryango w’Abibumbye bari mu gikorwa cy’ubugenzuzi kuri iri ruka bifashishije indege, yerekanye ko byageze aho Nyiragongo iruka yerekeza mu mujyi wa Goma, aho yageze mu duce twa Buhene na Kihisi.
Muri icyo gihe, ni ko umubare w’abahunga berekeza i Rubavu na Sake wiyongera, bikaba bivugwa ko hari n’ibikorwa bikomeye by’i Goma, by’umwihariko iby’ubucuruzi byahagaze.
Amakuru aturuka muri RDC muri iki gitondo, avuga ko Nyiragongo itakiruka, bikaba byatumye abahunze baba abari muri Rubavu batangira gusubira iwabo.
Ikirunga cya Nyiragongo cyaherukaga kuruka mu 2002. Icyo gihe abantu bagera kuri 250 bahasize ubuzima.
Kurikira ibiganiro n’amavidewo binyura kuri Bwiza TV
