U Rwanda rwasabye Uganda gusenya gereza za RNC na RUD-Urunana ziri ku butaka bwayo

Intumwa z’u Rwanda ziyobowe na Amb. Olivier Nduhungirehe, Umunyamabanga wa Leta muri Minisiteri y’Ububanyi n’Amahanga ushinzwe umuryango wa Afurika y’iburasirazuba.

Hari kandi Minisitiri w’umutekano w’imbere mu gihugu, Gen. Patrick Nyamvumba, n’abandi bayobozi batandukanye.

Intumwa za Uganda zo zari ziyobowe na Minisitiri wa Uganda ushinzwe ububanyi n’amahanga, Sam Kutesa, Minisitiri w’ubutabera, William Byaruhanga, Gen. Jeje Odongo uyobora Minisiteri y’umutekano w’imbere mu gihugu, Ambasaderi wa Uganda mu Rwanda Olive Woneckha, n’abandi.

U Rwanda rwasabye Uganda gufunga imiryango ya gereza z’iriya mitwe ziri ku butaka bwayo, nyuma y’uko hakunzwe kuvugwa Abanyarwanda bafungiye muri gereza zitazwi muri Uganda. Abenshi muri aba bivugwa ko ari abanze kwinjira muri iriya mitwe irwanya ubutegetsi bw’u Rwanda.

Ikindi Leta y’u Rwanda yasabye iya Uganda, ni uko itabwa muri yombi rya hato na hato Abanyarwanda bw’inzirakarengane bakorerwa rihagarara, ndetse iki gihugu kikaba cyasabwe guhagarika ubufasha ubwo ari bwo bwose giha imitwe igambiriye guhungabanya umutekano w’u Rwanda.

Inama yo kuri uyu wa Gatanu yari igamije kurebera hamwe aho ishyirwa ry’imyanzuro yafatiwe mu nama zahurije i Luanda abakuru b’ibihugu bya Uganda, u Rwanda, Repubulika iharanira Demokarasi ya Congo na Angola rigeze.