Igisirikare cya Repubulika ya Demukarasi ya Congo (RDC) kizwi nka FARDC kiri ku mwanya wa 81 mu 140 bigaragara kuri raporo nshya ya Global Fire Index yasohotse muri Werurwe 2021.
Iyi raporo itegurwa n’urubuga Global Fire Power igaragaza ko igisirikare cya RDC kirwanira mu kirere, gifite indege zibarirwa muri 50 zikora inshingano zitandukanye zirimo: indwanyi n’izifashishwa mu bwikorezi.
Urubuga Flight Global rwakusanyije amakuru y’indege zose iki gisirikare gitunze kugeza mu mwaka ushize (2020), kiyashyira muri raporo yacyo ngarukamwaka yitwa ‘World Air Forces’.
Iyi raporo yerekana ko iki gisirikare gifite indege z’indwanyi zirimo: 2 za Mikoyan MiG-23 n’4 za Sukhoi Su-25, zose zakorewe mu Burusiya.
Iki gisirikare kandi gifite indege za kajugujugu zaremerewe kugaba ibitero zirimo: 2 za Bell 206 zakorewe muri Canada, 2 za Mil Mi-2, 4 za Mil Mi-8/17, 8 za Mil Mi-24, 1 ya Mil Mi-26 zakorewe mu Burusiya, 2 za SA316, 10 za SA330 n’izindi 5 za UH-1H zakorewe muri Leta Zunze Ubumwe za Amerika (USA).
Igisirikare cya RDC kirwanira mu kirere gifite indege zifashishwa mu bwikorezi zirimo: 3 za Boeing 727 n’indi ya Boeing 737 zakorewe muri USA, 1 ya Antonov An-12, 3 za Antonov An-26 n’indi ya Antonov An-72 zakorewe mu Burusiya n’indi ya Douglas DC-8 yakorewe muri USA.
Icyitonderwa: Byashoboka ko hari ubwoko bw’indege iki gisirikare cyaba gifite, butagaragara muri iyi raporo.
Kurikira ibiganiro n’amavidewo binyura kuri Bwiza TV
