Umuryango utegamiye kuri leta urwanya agakoko ka sida muri Uganda, wakoranye umukwabu n’igipolisi mu Karere ka Mbarara abantu batari bacye bakora iby’ubuvuzi bashinjwa gutanga ibisubizo bitari byo by’uko umuntu yanduye batabwa muri yombi.
Uyu muryango witwa HIV Termination Technology Survival for the Fit wabashije kumenya ko mu bigo nderabuzima bigera kuri 6 muri Mbarara hatangiwe ibisubizo bitari byo ku bwandu bwa sida.
Itsinda ry’uyu muryango ryari riyobowe na Major (Rtd) Rubaramira Ruranga, wahawe uburenganzira n’urwego rushinzwe ubugenzuzi mu buvuzi muri perezidansi ndetse wongera guhabwa uburenganzira n’umukuru w’Inteko ishinga Amategeko,Rebecca Alitwara kadaga, ngo ujye kugenzura niba abakozi b’ibigo nderabuzima byo muri Mbarara ari abo kwizerwa.
Nk’uko byatangajwe n’umukuru w’ishami rishinzwe ubugenzacyaha mu gipolisi cya Mbarara, Taban Chiriga, ngo uwitwa Dan Byakatonda, umukozi wo kuri terrain w’umuryango twavuze, yigize umukiriya ushaka guhabwa ibisubizo by’uko ari muzima, abasha kubihabwa na za clinic ku giciro gito ndetse batiriwe banamupima.
Igipolisi kivuga ko abafashwe bakekwaho ibi byaha bagera kuri batandatu baje kurekurwa nyuma yo gutanga ingurane, ariko dosiye zabo ngo zikaba zashyikirijwe umushinjacyaha wa leta uzatanga umwanzuro.
Taban yakomeje aburira abaturage abasaba kujya bitondera ibigo nderabuzima bajya kwivurizamo cyangwa kwipimishirizamo nk’uko Chimpreports dukesha iyi nkuru ikomeza ivuga.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns./Bwiza.com
