Depite Robert Kyagulanyi (Bobi Wine) ukurikiranweho icyaha cyo kurenga ku mategeko agenga abadepite muri Uganda akaba yari afungiye muri Gereza ya Luzira, kuri uyu wa Kane yarekuwe by’agateganyo amaze gutanga amafaranga.
Umucamanza wo mu Rukiko rwa Buganda Road, Esther Nahirya yamutegetse kwishyura miliyoni 1 y’amashilingi kugirango arekurwe.
Abandi bantu batatu biyemeje kumwishingira nabo basabwe kwishyura miliyoni 10 z’amashilingi za caution nk’uko iyi nkuru dukesha Daily Monitor ikomeza ivuga.
Abamwishingiye akaba ari abadepite bagenzi be barimo, Patrick Nsamba uhagarariye Kassanda y’Amajyaruguru, Gafa Mwatekamwa, uhagarariye Kasambya, ndetse n’uwahoze ari minisitiri w’imyitwarire, Miria Matembe.
Urukiko ruteganya kuzumva urubanza kuwa 23 Gicurasi, rukaba rwamubujije gukoresha imyigaragambyo itemewe kuko ngo byatuma kurekurwa by’agateganyo bikurwaho.
Ubushinjacyaha bukaba buvuga ko uyu muhanzi wabaye umunyapolitiki yakoze icyaha muri Nyakanga 2018. Yatawe muri yombi kuwa Mbere ushize ubwo yari yitabye Ubuyobozi bw’Ubugenzacyaha (CID) agiye guhatwa ibibazo.
Hagati aho, umuvandimwe wa Bobi Wine, Fred Nyanzi Ssentamu, n’abitwa David Lule, Edward Sebuwufu n’abandi bo baracyashakishwa bakurikiranweho kuba barakoresheje imyigaragambyo itemewe binyuranyije n’ingingo y’116 yo mu gitabo cy’amategeko ahana muri Uganda.
