Uganda: Sheikh Yunus Kamoga na bagenzi be 3 bakatiwe igifungo cya burundu bazira iterabwoba

Urukiko Rukuru rwa Kampala kuri uyu wa kabiri rwakatiye igifungo cya burundu Sheikh Yunus Kamoga na bagenzi be batatu bari bakurikiranweho ibikorwa by’iterabwoba. Abacamanza bo muri uru rukiko mu rugereko rushinzwe ibyaha mpuzamahanga, bakaba batangaje iki gihano nyuma gato ya saa kumi z’umugoroba.

Abandi batatu bakatiwe igifungo cya burundu ni; Muluta Mudde Bukenya, Fahad Kalungi na Siraje Kawooya.

Bose uko ari bane, bakaba bari abayobozi mu idini ya Islam, bakatiwe hagendewe ku mikirize y’urubanza yagaragaje ko aba bananiwe kuzana umwuka mwiza ushingiye ku mibanire mu bo bari bakuriye. Abandi babiri bari bakurikiranweho icyaha cy’iterabwoba, Sekayanja Abdul Salaam na Kakande Yusufu alias Abdallah, bo bakatiwe imyaka 30 y’igifungo kubera ko batabaga mu myanya y’ubuyobozi bw’idini.
[xyz-ihs snippet=”google-pub”]

Icyaha cy’iterabwoba mu mategeko ya Uganda, gihanishwa ingingo ya 71 (b) y’amategeko ahana iterabwoba ya Uganda, igena igihano byibuze cy’imyaka 35 kugeza ku gifungo cya burundu.

Abacamanza bakaba bavuga ko bafashe ibi bihano bagendeye ku buremere bw’icyaha cy’iterabwoba bari bakurikiranweho ndetse no gutanga ubutumwa ku bakoresha nabi imyanya y’ubuyobozi. Bongeyeho kandi ko icyaha cyakozwe cyagambiriwe kandi kigapangirwa mu misigiti n’ahantu hatandukanye.

Sheikh Kamoga na bagenzi be batanu bakatiwe kuri uyu wa Kabiri, bahamijwe icyaha cy’iterabwoba ariko bahanagurwaho icyaha cyo kugerageza kwica bagenzi babo b’abayobozi b’Abasilamu.

Bashinjwaga kugira uruhare mu rupfu rwa Sheikh Mustapha Bahiga, Sheikh Abdu Kadhir Muwaya, Sheikh Hassan Kirya, ndetse no kugerageza kwica Sheikh harunah Jemba nk’uko Chimpreports ikomeza ivuga. Kamoga akaba yaraje kumenyekanaho ko yagiye atera ubwoba bamwe mu bapfuye ndetse n’abarokotse.

Abunganira abaregwaga ariko bo baravuga ko ibimenyetso byashingiweho mu guhamya icyaha Kamoga na bagenzi be batanu bidafite ishingiro, abacamanza bo bemeza ko bibahamya neza icyaha.

Hagati aho, abandi bantu 8 muri 14 bari bagejejwe mu rukiko, bagizwe abere nyuma yo gusanga nta cyaha kibahama, bahita barekurwa.
 
Kanda hano ujye ubona amakuru yihuse kandi kugihe kuri Facebook no kuri twitter
 
Dennis Ns./Bwiza.com