Urukiko Rukuru rwa Gisirikare rwa Makindye muri Uganda rwakatiye Private Sam Omeno wo mu mutwe w’ingabo zidasanzwe-SFC na Nathan Esia, w’umusivili igifungo cy’imyaka 33 kubera kwiba amashilingi 750.000.
Ku wa mbere, Urukiko Rukuru ruyobowe na Lt. Gen. Andrew Gutti rwahamije aba bombi icyaha cyo kwiba ku cyumweru gishize. Omeno wo mu mutwe w’ingabo zidasanzwe na Esia bahamwe n’icyaha cyo kwiba Deo Opedes ya Amashilingi 750.000 mu mudugudu wa Manga muri Paruwasi ya Manga mu gace ka Kamuge, mu Karere ka Bukedea ku itariki ya 17 Ukwakira 2021.
Nk’uko ubushinjacyaha buvuga, abakatiwe bakoresheje imbunda ya AK-47 ifie nimero UG-UPDF AK 575363 mu mugambi wabo. Aba bombi bakaba baraburanishijwe hamwe na Alex Okolong uzwi ku izina rya Aguero, n’umunyeshuri Joshua Solomon Opolot, wiga mu ishuri rikuru ry’abarimu rya Kaliro mu Karere ka Kaliro bakomeje kwemeza ko ari abere.
Ku ya 21 Gashyantare 2022, Lt. Alex Lasto Mukhwana yagaragaje ibimenyetso byabo muri dosiye baregamo Omeno na Esia. Nk’uko bigaragara mu rupapuro rw’ikirego, muri Nyakanga 2021, Private Omeno hamwe n’undi musirikare wa SFC uzwi ku izina rya James Odou igihe bari ku ishuri ry’imyitozo rya Kasenyi mu buryo butemewe n’amategeko, bafashe AK 47 na magazine zirindwi zirimo amasasu 210 babijyana mu gace ka Kamuge, mu karere ka Bukedea aho babisigiye Opolot.
Ku ya 17 Ukwakira 2021, Opolot yahaye intwaro Nathan na Okolong bajya kuyikoresha mu kwambura Opedes amafaranga. Ubushinjacyaha bwasabye urukiko kubaha igihano kibakwiriye, buvuga ko ibikorwa byabo byangiza isura y’ingabo, yongeraho ko mu gihugu hose ibibazo by’ubujura bikabije.
Ku ruhande rwabo nk’uko tubikesha ikinyamakuru The Independent cyo muri Uganda, abakatiwe basabye imbabazi kubera ko bafite abana n’imiryango yo kurera kandi ko ari ubwa mbere bakora icyaha. Mu gihe yakatiraga aba bombi, Gutti yavuze ko igifungo cy’imyaka 35 gikwiye ariko urebye impamvu nyoroshyacyaha, yagombye gukuramo amezi 16 n’iminsi bamaze bafunze by’agateganyo.
Yabahaye rero imyaka 33 n’iminsi 25 y’igifungo ariko abagira inama yo kujuririra iki gihano niba batishimiye icyemezo cye. Hakurikije ingingo ya 286 (2) y’itegeko ryerekeye amategeko ahana, igihano kinini ku cyaha cy’ubujura bukabije ni urupfu.
