Ingabo za Ukraine zirwanira mu kirere zatangaje ko misile ziraswa kure z’u Burusiya zo mu bwoko bwa Iskander zashize, bufata icyemezo cyo guhagarika kugaba ibitero ku birindiro byazo.
Umuvugizi w’izi ngabo, Colonel Yurii Ihnat, yatangarije itangazamakuru ryo muri Ukraine ko nyuma y’aho u Burusiya bushiriwe n’izi misile bwakoreshaga mu kurasa ku birindiro byabo, bwahimbye undi muvuno wo kubigaba ku bikorwaremezo by’ingenzi.
Yagize ati: “Kubera gushirirwa n’intwaro zirasa kure, u Burusiya bwahinduye umuvuno wabwo muri Ukraine. Buri kugaba ibitero ku duce tw’ibikorwaremezo by’ingenzi, aho kubigaba ku birindiro by’ingabo.”
Col. Ihnat yasobanuye ko u Burusiya bushaka kugura misile muri Iran na Koreya ya Ruguru kuko ngo Iskander zabwo zamaze gushira. Ati: “Mu gihe ububiko bw’u Burusiya bwa misile za Iskander bwakamye, Kremlin iri gushaka kugura na Iran hamwe na Koreya ya Ruguru.”
Gusa uyu musirikare yatangaje ko u Burusiya busigaranye izindi misile z’ubwoko bwa S-300 n’iza Kh-22 zo mu bihe by’Abasoviyeti. Ngo ziri gukoreshwa ku ntera ngufi, ku rubuga ruberaho urugamba.
