Guverinoma ya Ukraine yafashe icyemezo cyo gucyura ingabo zayo 250 zari mu butumwa bw’amahoro bw’Umuryango w’Abibumbye muri Repubulika ya Demukarasi ya Congo (RDC) buzwi nka MONUSCO.
Iki cyemezo cyamenyeshejwe uyu muryango, UN, nk’uko Umuvugizi wayo mu ishami rishinzwe ubutumwa bw’amahoro yabitangaje, agira ati: “UN yakiriye ubutumwa bwa Guverinoma ya Ukraine bwo gucyura ingabo zayo 250, za kajuguju n’ibindi bikoresho yifashishaga muri MONUSCO.”
UN yaboneyeho gushimira umusanzu izi ngabo zatanze mu butumwa zarimo muri RDC. Iti: “Twakiriye iki cyemezo kandi turashimira Ukraine ku bw’umusanzu ukomeye yatanze muri MONUSCO no mu bindi bikorwa by’amahoro.”
Muri izi ngabo 250, Ukraine yari ifitemo abofisiye 6 n’abapolisi 5. Yari inafite muri RDC impunguke 7 zatangaga umusanzu ku rwego rwa UN.
Ukraine ifashe iki cyemezo mu gihe iri mu ntambara n’u Burusiya, aho ihamagarira abakorerabushake n’abanyamahanga babyifuza kandi bafite ubunararibonye mu kurwana kujya gufasha abasirikare.
