Umufaransa Alan Boileau ukinira ikipe ya B&B Hotels y’iwabo, ni we wegukanye agace ka kabiri ka Tour du Rwanda ya 2021 kakinwe kuri uyu wa Mbere tariki ya 03 Gicurasi 2020.
Abasiganwa kuri uyu wa Mbere bavaga ku nyubako ya MIC rwagati mu mujyi wa Kigali, berekeza mu mujyi wa Huye ku ntera ya kilometero 120.5.
Alan Boileau yegukanye kariya gace akoresheje amasaha atatu, iminota irindwi n’amasegonda 14.
Umunya-Colombia Umba Lopez Abner Santiago wa Androni Giocattoli wasizwe amasegonda atandatu na Boileau ni we wabaye uwa kabiri mu gace k’uyu munsi ahita anafata umwambaro w’umuhondo.
Uyu yarushaga amasegonda abiri igikundi cy’abakinnyi 22 barimo na Sanchez Brayan Vergara (Medellin) wari wambaye umwambaro w’umuhondo nyuma yo kwegukana agace ka mbere ka Tour du Rwanda kakinwe ku cyumweru kava i Kigali kerekeza i Rwamagana.
Umunyarwanda waje hafi uyu munsi ni Uhiriwe Byiza Renus wa Team Rwanda wakoresheje amasaha atatu, iminota irindwi n’amasegonda 22, aba uwa 20 mu gihe Mugisha Samuel wa 26, yasizwe amasegonda 36 na Alan Boileau.
Uwihirwe kandi ni nawe Munyarwanda uri hafi ku rutonde rusange aho ari ku mwanya wa 10 aho arushwa amasegonda abiri na Umba Lopez.
Tour du Rwanda 2021 izakomeza ku wa Kabiri tariki ya 4 Gicurasi 2021 hakinwa agace ka gatatu kazahagurukira i Nyanza kerekeza i Gicumbi ku ntera y’ibilometero 171,6.
