Umugaba Mukuru w’ingabo za Kenya, General Francis Ogolla, yasuye ahantu hatandukanye mu Rwanda guhera kuri uyu wa 26 Kamena 2023.
Uyu musirikare yaje muri iki gihugu mu muhango wo gusoza ku mugaragaro imyitozo ihuriweho y’abasirikare bo mu bihugu bigize umuryango wa Afurika y’iburasirazuba, ‘Ushirikiano Imara’ yaberaga mu ishuri rikuru rya gisirikare riri i Musanze.
Nyuma y’uyu muhango, kuri uyu wa 27 Kamena Gen. Ogolla yasuye urwibutso rwa jenoside yakorewe Abatutsi rwa Kigali, yunamira abaruhukiyemo.
Gen. Ogolla, nk’uko Minisiteri y’ingabo ibisobanura, yanasuye ibiro bikuru bacyo, yakirwa n’Umugaba Mukuru, Lieutenant General Mubarakh Muganga, baganira uko bazamura ubufatanye mu bya gisirikare buri hagati y’ibihugu byombi.
Uyu musirikare yanasuye Minisitiri w’ingabo w’u Rwanda, Juvénal Marizamunda, mu biro bye.
Amafoto: Rwanda MOD
