Umugaba Mukuru w’Ingabo za Espagne, Gen. Miguel Angel Villaroya, yeguye kuri izi nshingano kubera igitutu yashyizweho azira gufata urukingo rwa Covid-19 mbere y’abarukeneye byihutirwa.
Nk’uko Ibiro Ntaramakuru by’Abongereza (Reuters) byabitangaje, Gen. Villaroya yakoze iri kosa tariki ya 22 Mutarama 2021, ubwo yageraga aho abandi barimo abakozi bo mu nzego z’ubuzima n’abasheshe akanguhe bategerereje guterwa urukingo, abatanga kurufata kandi atari ku rutonde.
Nyuma yo kumenya iby’iyi myitwarire idahwitse, abiganjemo abakoresha imbuga nkoranyambaga batangiye kunenga uyu musirikare, bongeraho ko yasebeje igisirikare cya Espagne.
Byatumye kuri uyu wa 23 Mutarama 2021, Gen. Villaroya w’imyaka 63 y’amavuko yandikira Minisitiri w’Ingabo, Margarita Robles ibaruwa imumenyesha ko yeguye kugira ngo igisirikare gisubirane isura nziza.
