Umuherwe wa mbere ku Isi, Elon Musk, wigeze gusaba Perezida Putin ko bahura bagahangana uko ari babiri yamutsinda agahagarika intambara yo muri Ukraine, kuri ubu aravuga ko Abarusiya bari kumutera ubwoba.
Uyu muyobozi w’uruganda rw’imodoka zikoreshwa n’amashanyarazi rwa Tesla Inc., azwiho kuba atarigeze atinya guhangana n’abamurwanya ku mugaragaro kandi ntagire ubwoba, ari nacyo miliyoni 91.5 z’abamukurikira kuri twitter ngo bamwemerera.
Ubwo u Burusiya bwateraga Ukraine kuwa 24 Gashyantare niwe muyobozi wa mbere w’ikigo mpuzamahanga wiyemeje gufasha Ukraine.
Ntabwo Musk yahisemo Kyiv gusa, ahubwo yohereje itumanaho rya Starlink, serivise ya interineti y’icyogajuru cye, SpaceX, muri Ukraine. Ntabwo Starlink yemerera abanya Ukraine kwigenga kuri interineti gusa, serivise zayo zituma igihugu gikomeza gutumanaho n’Isi. Starlink ikoreshwa cyane mu bice byatewemo ibisasu n’u Burusiya no mu turere twa kure.
Izi serivisi za internet kandi zifasha abayobozi ba Ukraine mu ntambara y’itumanaho bahanganye n’u Burusiya.
Elon Musk, uherutse kugura twitter ku kayabo ka miliyari zisaga 40 z’amadolari, yigeze guhiga na Putin amusaba ko bakwirwanira ubwabo uko ari babiri kugirango intambara yo muri Ukraine ihagarare.
Kugeza ku itariki 6 Gicurasi, abaturage 3,150 ba Ukraine bari bamaze kwicwa, mu gihe inyubako nyinshi zimaze gusenywa.
‘Nindamuka mpfuye’
Abanya Ukraine bagera kuri miliyoni 5.8, cyangwa hafi 14% by’abatuye iki gihugu, babaye impunzi nyuma yo guhungira mu bihugu baturanye.
Inkunga ya Musk muri Ukraine yatumye anengwa na bamwe mu bayoboke ba Putin bamwise amazina. Ariko kunegura ubu bisa nkaho byahindutse gutera ubwoba ubuzima bw’umuherwe. Uyu muherwe yashyize ku rubuga rwe rwa Twitter ubutumwa bwa Dmitry Rogozin, umuyobozi w’ikigo gishinzwe isanzure cy’u Burusiya, Roscosmos.
Kuri iki Cyumweru, itariki ya 8 Gicurasi, Musk yanditse ku rubuga rwa Twitter ati: “@Rogozin yohereje ibi mu bitangazamakuru byo mu Burusiya.”
Ukurikije ubusobanuro bwakozwe na TheStreet dukesha iyi nkuru, iyi nyandiko iri mu Kirusiya ikubiyemo iterabwoba ku buzima bwa Musk.
.@Rogozin sent this to Russian media pic.twitter.com/eMI08NnSby
— Elon Musk (@elonmusk) May 9, 2022
“Duhereye ku buhamya bw’umuyobozi w’ingabo wafashwe wa Burigade ya 36 ya Marine y’ingabo za Ukraine, Colonel Dmitry Kormyankov, bigaragara ko ibikoresho by’abafatabuguzi bishinze ku butaka bya sosiyete ikora ibyogajuru ya Starlink ya Elon Musk byashyikirijwe abarwanyi b’Abanazi ba Batayo ya Azov hamwe n’aba-marine b’ingabo za Ukraine kugera Mariupol bijyanywe na kajugujugu za gisirikare. ”
“Dukurikije amakuru yacu, gutanga no kohereza mu ngabo za Ukraine ibisanduku bya PO byo kwakira no kohereza interineti iturutse kuri Starlink byakozwe na Pentagon.”
Yanzuye rero agira ati: “Elon Musk rero agira uruhare mu guha ingabo z’Aba-fashiste muri Ukraine itumanaho rya gisirikare.”
Noneho hakurikiraho iterabwoba ku buzima bw’umuyobozi mukuru wa Tesla.
“Kandi kubw’ibyo, ugomba gusubiza mu buryo bw’abantu bakuze, Elon, uko wakwihindura umuswa kose.”
Muri 2014, Rogozin yari minisitiri w’intebe wungirije. Muri icyo gihe, u Burusiya bwari bwaragabye igitero bwa mbere muri Ukraine, bwigarurira Crimée.
Musk asa nkaho afatana uburemere iri terabwoba.
Umuherwe yanditse ati: “Nindamuka mpfuye mu buryo bw’amayobera, byabaye byiza kukumenya”. Muri tweet yabanjirije iyi, yibaza uburyo Rogozin yakoresheje ijambo ‘nazi’.
Umuherwe ati: “Ijambo” Nazi “ntabwo risobanura icyo asa naho atekereza.”
Nyuma y’amasaha make nyuma y’izi tweet, Musk yashyizeho indi asezeranya kuzakora ibishoboka byose kugirango akomeze kubaho.
Ati: “Mumbabarire! Nzakora ibishoboka byose kugira ngo nkomeze kubaho”.
Ngo ntabwo ari ubwa mbere Rogozin yibasiye Musk, ariko ni ubwa mbere amuteye ubwoba. Rogozin yari yabanje kwibasira Musk nyuma yo gutanga igitekerezo cyo guhangana na Putin bonyine.
Ibi rero byatumye abakurikirana Musk kuri twitter bamugirira impuhwe ndetse bamwe batangira kumugira inama yo gukaza umutekano we.
