Umuherwe wo muri Uganda witwa Joel Jaffer A’ita arashaka kugura ikipe ya Chelsea iri mu cyiciro cya mbere muri shampiyona y’u Bwongereza ku madolari ya Amerika miliyari 3.3.
Uyu muherwe ufite imigabane myinshi muri kaminuza ya Makerere, akaba na nyiri Arua Hill FC iri mu cyiciro cya mbere muri shampiyona ya Uganda, yagize iki cyifuzo nyuma y’aho umuherwe w’Umurusiya Roman Abramovich atangarije ko agiye kugurisha Chelsea yari yaraguze mu mwaka w’2003.
Nk’uko BBC Swahili ibivuga, Joel yagize ati: “Niteguye kugura ikipe ya Chelsea. Nyuma yo kumva amakuru y’uko Chelsea igiye kugurishwa, ndagira ngo nsobanure icyifuzo cyacu cyo kuyigura. Ku giciro cyayo cy’amadolari ya miliyari 3.2, twatanga miliyari 3.3. Tunateganya ko twanahindura izina ry’iyi kipe, ikitwa nka Kongolo FC.”
Uyu muherwe abaye Umugande wa kabiri ugaragaje ko ashaka kugura ikipe yo mu Bwongereza. Uwitwa Michael Ezra Mulyoowa we yashatse kugura Leeds United ku madolari miliyoni 60 mu mwaka w’2004.
