Mu gitondo cyo kuri uyu wa Kabiri nibwo Kapiteni w’ikipe y’igihugu y’umupira w’amaguru yari iri muri CHAN, Tuyisenge Jacques, yerekeje muri Kenya aho agiye gukinira ikipe ya Gor Mahia, ifite igikombe cya shampiyona.
Uyu mukinnyi wakiniraga Police FC yasinye amasezerano y’imyaka ibiri muri Gor Mahia mbere y’uko imikino ya CHAN 2016 itangira, aho yaguzwe miliyoni zisaga 30 z’Amanyarwanda
Kuba Tuyisenge yari agifite umwaka ku masezerano ya Police FC yayishyuye ibihumbi 20 $, iyi kipe yabashinzwe umutekano imuha uburenganzira bwo kwerekeza muri iyi kipe ifite ibikombe 15 bya shampiyona nk’umuhigo.
Uyu mugoroba kuri Nyayo stadium nibwo ubuyobozi bwa Gor Mahia bwereka abafana bayo abakinnyi bazakinisha mu mwaka w’imikino barimo 11 bashya barimo Tuyisenge Jacques, Jacob Keli, Jackson Saleh na Francis Kahata.
Tuyisenge asanze muri Gor Mahia abakinnyi nka Sibomana Abuba bakinana mu ikipe y’igihugu na Nizigiyimana Kharim “Mackenzi” wakiniye Rayon Sports.
Byari biteganyijwe ko kuri uyu wa Gatatu, Gor Mahia izerekeza muri Uganda gukina umukino wa gicuti na SC Villa ariko Gor Mahia yasimbujwe Tusker FC, nyuma yo gukinira muri Ethiopia na Sudani nk’uko Izuba Rirashe dukesha iyi nkuru rivuga.
Gor Mahia izakina umukino wa mbere wa shampiyona tariki ya 17 Gashyantare 2016 basura Chemelil, uwa kabiri bakire Posta Rangers tariki ya 21 Gashyantare 2016.
Muri CAF Champions League, Gor Mahia izatangira tariki ya 12-14 Gashyantare bakira CNaPS Sport yo muri Madagascar, umukino wo kwishyura 26-28 Gashantare 2016.
Bwiza.com
