Nyuma y’imyaka 34 atangiye gukina umupira w’amaguru nk’uwabigize umwuga, Kazuyoshi Miura yaciye agahigo ko kuba umukinnyi ukuze kurusha abandi ugaragaye muri shampiyona y’ikiciro cya mbere mu Buyapani.
Ku wa Gatatu w’iki cyumweru uyu mugabo yagaragaye mu mukino ikipe ye ya Yokohama FC asanzwe anabereye Kapiteni yatsinzwemo na Kawasaki ibitego 3-2.
Miura w’imyaka 53 y’amavuko, yari asanganwe agahigo ko kuba ari we mukinnyi w’umupira w’amaguru wabigize umwuga ukuze kurusha abandi ku Isi.
Uyu mukinnyi uzwi nka “King Kazu”, yatangiye gukina nk’uwabigize umwuga mu 1986 mu gihugu cya BrĂ©sil, kubera ko Ubuyapani nta rushanwa ry’ababigize umwuga bwagiraga yagombaga gukinamo.
Mu mukino wa Yokohama na Kawasaki, rutahizamu Miura nta gitego yigeze atsinda mbere yo gusimburwa hafi y’umunota wa 60 w’umukino, agahabwa urufaya rw’amashyi n’abafana babarirwa muri 4,000 bari bari muri Stade ya Todoroki.
Ni wo mukino wa mbere Miura yari akinnye muri shampiyona y’ikiciro cya mbere y’Abayapani kuva muri 2007, ubwo ikipe ye ya Yokohama yari itaramanuka mu kiciro cya kabiri.
Iyi kipe byayisabye imyaka 12 yose ikina mu kiciro cya kabiri mbere yo kongera kugaruka mu cya mbere mu mwaka ushize.
Miura anafite amateka akomeye mu kipe y’igihugu y’Abayapani, dore ko kugeza mu 2000 ubwo yayikiniraga umukino wa nyuma yari amaze kuyitsindira ibitego 55 mu mikino 89.
Gukina muri shampiyona y’Abayapani byatumye aca agahigo kari gafitwe na rutahizamu Masashi Nakayama wakiniye Consadole Sapporo muri 2012 afite imyaka 45 y’amavuko.
“King Kazu” si we musaza wenyine wari mu kibuga ubwo ikipe ye yakinaga ku wa Gatatu w’iki cyumweru, dore ko na Shunsuke Nakamura wamamaye mu kipe ya Celtic no mu kipe y’igihugu y’Abayapani na we yari mu bakinnyi 11 babanje mu kibuga ku ruhande rwa Yokohama, we akaba afite imyak42.
