Umunyamakuru Steve Wembi yatawe muri yombi, yaba aryozwa u Rwanda

Umunyamakuru Steve Wembi uri mu bakomeye bakorera muri Repubulika Iharanira Demokarasi ya Congo, yaraye atawe muri yombi n’inzego z’iperereza z’iki gihugu.

Steve Wembi ni umunyamakuru ukora inkuru zicukumbuye ndetse n’izerekeye ibyaha; akaba asanzwe akorera ikinyamakuru The New Times i Kinshasa.

Uyu munyamakuru yaraye atawe muri yombi n’urwego rushinzwe iperereza muri Congo Kinshasa (ANR), nyuma yo kumufatira muri Hotel Léon iherereye muri Komine Gombe i Kinshasa.

Atabwa muri yombi yari kumwe na nyina umubyara, umugore we ndetse n’umunyamakuru mugenzi we Pascal Mulegwa ukorera Radiyo Mpuzamahanga y’Abafaransa (RFI); gusa aba uko ari batatu amakuru avuga ko barekuwe mu gitondo cyo kuri uyu wa Kabiri.

Wembi yatawe muri yombi mu gihe yari amaze igihe yikomwa na benshi mu banye-Congo ku mbuga nkoranyambaga, bamushinja gutangaza amakuru abogamiye ku nyeshyamba za M23 ndetse no ku Rwanda bashinja gufasha uriya mutwe.

Abenshi bamushinjaga kutabogamira ku gisirikare cya Congo Kinshasa (FARDC) ngo atangaze ko kiri gukubita inshuro M23 bamaze igihe bahanganye mu mirwano; ibyo baheraho bamwita umugambanyi.

Steve Wembi yatawe muri yombi nyuma y’iminota mike Minisitiri w’itumanaho muri RDC akanaba umuvugizi wa Guverinoma, Patrick Muyaya amwikomye; n’ubwo atigeze atangaza amazina ye.

Muyaya yavuze ko hari yababajwe cyane no “kubona amajwi y’abasirikare ba FARDC bari ku rugamba asakara ku mbuga nkoranyambaga”, atunga urutoki umwe mu banyamakuru b’igitangazamakuru mpuzamahanga nka nyirabayazana wo kugira ngo asakazwe.

Kugeza ubu nta wuzi aho Wembi afungiye.

Itabwa muri yombi rye cyakora cyo ryamaganwe na bamwe mu banye-Congo bavuga ko kuba yuzuza inshingano ze nk’umunyamakuru w’umwuga bitagakwiye guhinduka icyaha.