Amashusho y’umugore w’imyaka 20 akomeje gukwirakwizwa ku mbuga nkoranyambaga, abatari bake bayavugaho byinshi, aho banenga polisi yamukoreye ihohotera imukubita ingumi mu mutwe, nyuma ikanamwambika amapingu.
Ibi byabereye ku kirwa cya New Jersey, muri Leta Zunze Ubumwe za Amerika, ku wa 27 Gicurasi 2018, aho umugore w’imyaka 20 y’amavuko witwa Emily Weinman, ukomoka muri Philadelphia yakorewe ihohoterwa na Polisi.
Ikinyamakuru indy100 gitangaza ko abapolisi begereye Emily Weinman ubwo bakekaga ko yaba arimo kunywera ibisindisha kuri icyo kirwa. Ubwo yashakaga kumwambika amapingu, umupolisi umwe agaragara muri Video y’amasegonda 54 amukubita ingumi mu mutwe, amukaraga amaboko n’ijosi n’ibindi bikorwa by’ihohotera.
Abicishije ku rukuta rwa Twitter, uyu mugore nyuma yisobanuye avuga ko atigeze anywera ibisindisha kuri uyu mwaro, akavuga ko inzoga yari afite yari igipfundikiye.
Gusa uburyo umupolisi yahohoteyemo uyu mugore benshi bagiye babunenga bakoresheje imbuga nkoranyambaga zitandukanye.
