Umupolisikazi wo mu gihugu cya Kenya ukorera kuri station ya polisi yo muri Embakasi, muri Nairobi, yatawe muri yombi ashinjwa kwishora mu bikorwa by’ubujura muri Mombasa afatanyije n’abasivili.
Hellen Wanjiru Wamweu yafatanwe n’abasivili babiri; Harrison Marube Biko na Fredrick Gatheri, bose batuye Nairobi.
Raporo ya polisi yabonwe na Nairobi News ivuga ko station nkuru ya polisi muri Mombasa, igendeye ku makuru y’ibanga yahawe, yabashije gufata Wanjiru kubera icyaha cy’ubujura.
Iyi nkuru ikomeza ivuga ko aba uko ari batatu bagerageje kwiba umusivili mu Mujyi wa Mombasa.
Abapolisi bagerageje kubakurikirana ariko babasha kubacika bakoresheje imodoka ya Mercedes Benz ifite ibirango; KDE 711Q.
Aba ariko ngo baje gufatirwa muri iyi modoka n’ubundi muri weekend ishize ariko ibirango byayo byahinduwe ihabwa KCB 363R.
“Mu gusaka, amapingu ya Wanjiru yarabonetse,”
Imodoka yahise ijyanwa kuri station ya polisi abakekwa nabo bashyirwa muri kasho mu gihe iperereza rikomeje, bikaba biteganyijwe ko bazashyikirizwa urukiko kur uyu wa Mbere, itariki 4 Nyakanga.
