Ku wa Kane, indege ya gisirikare cya Leta Zunze Ubumwe za Amerika yakoze impanuka mu murima w’umuceri mu ntara ya Maguindanao del Sur, mu majyepfo ya Filipine, ihitana umusirikare umwe wa Amerika n’abakozi batatu b’abasivili bakoreraga igisirikare cy’icyo gihugu.
Nk’uko byatangajwe n’ubuyobozi bwa Amerika bushinzwe ibikorwa mu karere k’Inyanja y’Abahinde n’iya Pasifika (U.S. Indo-Pacific Command), iyo ndege yari mu butumwa busanzwe bwo gutanga amakuru y’ubutasi no kugenzura, ku busabe bwa Leta ya Filipine.
Icyateye iyo mpanuka ntikiramenyekana, kandi iperereza riracyakomeje. Abaturage batangaje ko babonye umwotsi uturutse muri iyo ndege ndetse bumva n’iturika mbere y’uko yisekura ku butaka.
Ubuyobozi bw’indege za gisivili muri Filipine bwemeje iyo mpanuka ariko ntibwahise butanga andi makuru arambuye. Nta muturage wo ku butaka wakomeretse, ariko inyamaswa imwe (inka yari iri mu ishyo) yarapfuye.
Leta Zunze Ubumwe za Amerika imaze igihe ifatanya na Filipine mu bikorwa byo guhashya imitwe y’iterabwoba y’abahezanguni mu majyepfo y’icyo gihugu, aho higanjemo Abayisilamu.
