Umusirikare wa Repubulika ya Demokarasi ya Congo (RDC), yishe bagenzi babiri bo ku rwego rwa ba ofisiye, nyuma y’ubushyamirane bwabahuje ku wa Mbere tariki ya 9 Ugushyingo 2020.
Byabereye muri Teritwari ya Nyunzu ho mu Ntara ya Tanganyika mu majyepfo ya RDC.
Umuyobozi wa Teritwari ya Nyunzu, yabwiye 7Sur7.cd ko uwo musirikare yarashe bagenzi be ku gicamunsi (saa munani), ubwo bari imbere ya rimwe mu maduka yo muri kariya gace.
Ati: “Byabaye nyuma y’imvura. Twumvise urusaku rw’amasasu. Batubwiye ko umusirikare yarekuye urufaya rw’amasasu ku bofisiye babiri bahise bapfa.”
Umuvugizi wa FARDC muri Tanganyika, Colonel de Brigade, Sale, yavuze ko iperereza ryamaze gutangira kugira ngo hashakwe buryo ki uriya musirikare wahise utoroka yafatwa.
Yagize ati: “Akimara kurasa, yahise afata moto arahunga. Twamukurikiye (ngo bamufate) ariko ntibyakunda. Iperereza ryamaze gutangira kugira ngo afatwe.”
Umuvugizi wa FARDC muri Tanganyika yavuze ko intandaro y’amakimbirane yakuruye urupfu rwa bariya basirikare itaramenyekana.
