Umusoreshwa uzajya usaba gusubizwa imisoro mu buriganya ashobora kuzajya ahanishwa igifungo

Umusoreshwa wahamwe n’icyaha cyo gusubizwa imisoro mu buriganya ashobora guhanishwa igifungo kiri hagati y’imyaka ibiri n’imyaka itanu, kandi n’ihazabu ingana n’100 ku ijana y’amafaranga yasabye gusbizwa mu buryo budakwiye, nk’uko biteganywa mu mushinga w’itegeko rishya .

Guverinoma yavuze mu ngingo isobanura uyu mushinga mushya w’itegeko rihindura itegeko ryo mu mwaka wa 2019 ryerekeye imisoro, ko umushinga w’itegeko ryo guhana abasoreshwa basaba mu buryo butemewe gusubizwa imisoro, ugamije kwirinda uburiganya.

Zimwe mu ngingo z’iri tegeko zigira ziti: “Umusoreshwa usaba gusubizwa imisoro mu buryo bw’uburiganya aba akoze icyaha. Aramutse ahamwe n’icyaha, umusoreshwa ashobora guhanishwa igifungo kitari munsi y’imyaka ibiri kandi kitarenze imyaka itanu ndetse n’ihazabu ingana n’ijana ku ijana (100%) y’amafaranga yasabye gusubizwa mu buryo butemewe n’amategeko. ”

Nk’uko ikigo gishinzwe kwinjiza imisoro n’amahoro mu Rwanda (RRA) kibitangaza, ngo gusubizwa imisoro ni amafaranga asubizwa iyo imisoro yaciwe ku byinjijwe irenze ibyo umuntu agomba kwishyura mu misoro yinjira mu mwaka w’ingengabihe, cyangwa iyo umusoreshwa yishyuye ibirenze ibyo asabwa kwishyura.

Nanone, iyo umuntu ku giti cye cyangwa umusoreshwa yakiriye isoko ry’imiryango cyngwa ibigo bisonewe kwishyura umusoro ku nyongeragaciro (TVA), akuramo umusoro ku nyongeragaciro nk’uko biteganywa n’amategeko, hanyuma agatanga icyifuzo cyo gusubizwa kuri RRA.

Kuri uyu wa Gatatu, itariki ya 11 Mutarama, Komiseri Mukuru wa RRA, Pascal Bizimana Ruganintwali, yavuze ko umusoro ku nyongeragaciro (TVA) cyangwa undi musoro uwo ari wo wose atari amafaranga agenewe umucuruzi, ahubwo ari amafaranga agenewe inyungu rusange.

Yavuganaga n’abanyamakuru nyuma y’inama y’isesengura ry’itegeko ya komite ishinzwe ingengo y’imari n’umutungo.

Ati: “ Ni amafaranga yacu twese. Nshobora kuvuga ko umuntu ukora ibikorwa by’uburiganya ku musoro ku nyongeragaciro, ameze nk’umujura winjira mu nzu yanjye akanyiba ibyo ntunze ”, ibi akaba yabigaragaje, agaragaza ko abantu nk’abo bagomba guhanwa hakurikijwe amategeko.

Ati: “Tuzashyiraho uburyo butuma abasoreshwa bishyura imisoro ku buryo bworoshye, ariko abashaka kwiba cyangwa kunyereza imisoro ntibagomba kwihanganirwa kuko ari ikibazo gikomeye kigomba gukemurwa”.

Atanga imibare imwe n’imwe, Ruganintwali yerekanye ko RRA yakundaga kugumana 10 ku ijana by’imisoro ku nyongeragaciro yakusanyijwe kugirango ikoreshwe mu gusubizwa, ariko byagaragaye ko igipimo nk’iki kidahagije kugira ngo hasubizwe ibyifuzo byose byo gusubizwa by’inzego zose bireba.

Nyuma, yavuze ko RRA yazamuye iryo ijanisha kugera kuri 12 ku ijana.

Ati: “Kubera ko twabonye ko abantu benshi bahindura imyitwarire ku kwishyura umusoro ku nyongeragaciro uko bikwiye, … byiyongereye buhoro buhoro ku buryo kuri ubu, tugomba kwishyura miliyari zisaga 30 z’amafaranga y’u Rwanda agomba gusubizwa abasoreshwa”.

Depite Omar Munyaneza, Perezida wa komite ishinzwe ingengo y’imari n’umutungo w’igihugu yavuze ko kubera ko umusoro ku nyongeragaciro utangwa n’abaguzi, ugomba gucungwa neza ku nyungu rusange.

Ati: “Iki (igihano cyo kurwanya gusubizwa umusoro ku nyongeragaciro mu buriganya) ni inzira yo kubwira abantu ko amafaranga nk’ayo agomba gushyirwa mu isanduku y’igihugu kugira ngo akoreshwe mu iterambere ry’abaturage”.

Izindi mpinduka mu mushinga

Mu zindi mpinduka zigaragara mu mushinga w’itegeko, igihe cyo kubika ibitabo bya konti cyongerewe kuva ku myaka itanu kugeza ku myaka 10 guhera ku itariki ya 1 Mutarama y’umwaka ukurikira igihe cy’umusoro ibyo bitabo bifitanye isano nawo. Ibi bigamije guhuza umushinga w’itegeko n’andi mategeko, harimo agenga ubufatanye, kwizerana n’imfatiro.